Qazaqstan-Qytaı kelisimi: 15 myńnan astam jumys orny ashylady

ASTANA. KAZINFORM — Búginde Qazaqstan men Qytaı yntymaqtastyǵy aıasynda 2,7 mıllıard dollar bolatyn 10 joba iske asyrylý satysynda. Sonymen qatar 4,1 mıllıard dollar kólemindegi 8 joba ázirlenip jatyr. Bul týraly Syrtqy ister mınıstriniń orynbasary Álibek Qýantyrov málim etti. 

— Qazaqstan men Qytaı ındýstrııalyq-ınvestıtsııalyq yntymaqtastyqty ekijaqty negizde de tyǵyz damytyp keledi. Sońǵy 30 jyl ishinde Qytaı Qazaqstan úshin eń iri ekonomıkalyq áripteske aınaldy. Ekijaqty ekonomıkalyq qatynas aýyl sharýashylyǵynan bastap, mıneraldyq resýrstar, kólik salasy, joǵary tehnologııalar men energetıkaǵa deıingi keń aýqymdy salalardy qamtıdy, — dedi Álibek Qýantyrov «Ortalyq Azııa — Qytaı» ekinshi ındýstrııalyq-ınvestıtsııalyq yntymaqtastyq forýmynda.

Mınıstr orynbasarynyń aıtýynsha, qazir Úkimet ekijaqty birlesken ınvestıtsııalyq jobalar tizbesin keńeıtý máselesin pysyqtap jatyr. 

— Qazir jalpy somasy 14,75 mıllıard AQSh dollar bolatyn 47 jobany qamtıdy. 2015 jyldan beri jalpy quny 7,9 mıllıard dollar bolatyn 29 joba iske qosyldy. Sonymen qatar jalpy somasy 2,7 mıllıard dollar bolatyn 10 joba iske asyrylý satysynda. Al 4,1 mıllıard dollar kólemindegi 8 joba ázirlenip jatyr, — dedi ol.

Atalǵan yntymaqtastyq tetigi 15 myńnan astam jumys ornyn ashýǵa múmkindik beredi. 

Buǵan deıin habarlaǵanymyzdaı Qazaqstan men Qytaı 25 mlrd dollarǵa 60 kelisimge qol qoıdy.

Elordada «Ortalyq Azııa — Qytaı» ekinshi ındýstrııalyq-ınvestıtsııalyq yntymaqtastyq forýmy ótip jatyr. Forýmǵa Qazaqstan Respýblıkasy Premer-mınıstriniń birinshi orynbasary Roman Sklıar, ortalyq jáne jergilikti memlekettik organdardyń basshylary, Ortalyq Azııa elderiniń delegatsııalary, qytaılyq jáne óńirlik iri kompanııalardyń, sondaı-aq damý ınstıtýttarynyń basshylary qatysty. Forým aıasynda jalpy somasy 10 mıllıard AQSh dollarynan asatyn 50-den astam ekijaqty jáne kópjaqty qujatqa qol qoıyldy.