Qazaqstan – Qytaı: keden qyzmetteriniń basshylary úzdiksiz saýda forýmyna qatysty
Qazaqstan jáne Qytaı keden qyzmetteriniń basshylary úzdiksiz saýda forýmynda bas qosty, dep habarlaıdy Kazinform Memlekettik kirister komıtetine silteme jasap.
Beıjiń qalasynda ótken «Bir beldeý, bir jol» bastamasynyń halyqaralyq yntymaqtastyq jónindegi ІІІ forýmy aıasynda Qazaqstan Respýblıkasy Qarjy mınıstrligi Memlekettik kirister komıtetiniń tóraǵasy Jandos Dúısembıev úzdiksiz saýda jónindegi taqyryptyq jıynǵa qatysty.
Atalmysh is-sharany QHR Kommertsııa mınıstrligi, QHR Bas keden basqarmasy, QHR Memlekettik salyq ákimshiligi jáne Qytaı Eksımbanki birlese uıymdastyrdy.
Úzdiksiz saýda forýmyna qatysýshylar otyrys barysynda jahandyq ónerkásiptik tizbekter men jetkizý tizbekteriniń turaqtylyǵyn qoldaý, elektrondyq kommertsııa men «jasyl» saýdany ilgeriletý, kedendik, salyqtyq jáne qarjylyq yntymaqtastyqty nyǵaıtý máselelerin talqylady.
Sapar aıasynda Jandos Dúısembıev QHR Memlekettik salyq ákimshiliginiń komıssary Van Tszıýnmen kezdesý ótkizdi. Onda taraptar ekijaqty yntymaqtastyqty, sondaı-aq «Bir beldeý, bir jol» bastamasy sheńberindegi áriptestikti nyǵaıtýǵa ýaǵdalasty.
QR QM MKK tóraǵasy «Ortalyq Azııa-Qytaı» bastamasynyń keden qyzmetteri basshylarynyń otyrysyna qatysty.
Kezdesýde kedendik yntymaqtastyqtyń ózekti máseleleri talqylandy. Atap aıtqanda, taraptar: «Biryńǵaı tereze» jobasy sheńberinde yntymaqtastyq týraly kelisim jasasý, shekara mańyndaǵy ótkizý pýnktterin basqarý salasyndaǵy yntymaqtastyq, ıntrýzıvti emes jete tekserý jáne zııatkerlik kartografııalyq jete tekserý, kedendik táýekelderdi basqarý, quqyq qorǵaý salasyndaǵy yntymaqtastyq tetikterin jetildirý salasynda tájirıbe almasý boıynsha jumys toptaryn qurý týraly ýaǵdalasty.
Sonymen qatar Ortalyq Azııa elderi Qytaı tarapynyń saýdany jeńildetý jáne taýarlardy jetkizýdiń halyqaralyq tizbeginiń qaýipsizdigin arttyrý jónindegi sharalardy jetildirýge baǵyttalǵan, taýarlar týraly aldyn ala aqparat almasý salasyndaǵy yntymaqtastyq týraly kelisim jasasý múmkindigin qaraýdy usyndy.
Kelissózder qorytyndysy boıynsha taraptar máseleni birlesip sheshýge jáne ár taraptyń zańnamasyn eskere otyryp, kelisimniń jobasyn ázirleıtin boldy.
«Ortalyq Azııa – Qytaı» kezdesý alańynda Jandos Dúısembıev QHR Bas keden basqarmasynyń Mınıstri ıÝı Tszıanhýamen áńgimelesip, Qazaqstan-Qytaı memlekettik shekarasynda ótkizý múmkindigin ulǵaıtý máselesin talqylady jáne jaqyn arada týyndaıtyn problemalyq máselelerdi jedel sheshý boıynsha jumys tetigin qurý týraly kelisti.
