Qazaqstan Qytaı ekonomıkasyna qalaı kirip jatyr
ASTANA. KAZINFORM — Memleket basshysy Qasym-Jomart Toqaev 30 tamyz ben 3 qyrkúıek aralyǵynda Qytaı Halyq Respýblıkasyna Tóraǵa Sı Tszınpınniń shaqyrýymen bardy. Osy oraıda ótken bir jyldyń ishinde Qazaqstan Qytaı ekonomıkasyna qalaı kirikkenin sholyp kórdik.
Saýda-sattyq
Byltyrdan beri Qazaqstan Qytaıdyń ár óńirimen saýdany damytyp keledi. 2024 jyly Úrimshi qalasynda «QazTrade» AQ ókildigi ashyldy. «QazTrade» keńseleri Sychýan men Hýbeı provıntsııalarynda da iske qosyldy. Qytaı tarapy Shandýn provıntsııasynda taǵy bir ókildik qurýdy usyndy.
2024 jyldyń qarasha aıynda Sıanda «KAZAKH INVEST» UK AQ ókildik keńsesi jumysyn bastady. Ol Shaanxi baosheng Silk Road Construction Engineering Co Ltd. táýelsiz seriktesi arqyly jumys isteıdi. Kelisim aıasynda jańa ókildik Qazaqstannyń Qytaıdaǵy ınvestıtsııalaryn tartýǵa jáne jobalaryn ilgeriletýge járdemdesedi. Sonymen qatar, «KAZAKH INVEST» resmı keńsesi Beıjińde jumys isteıdi.
Kólik jáne logıstıka
Qazaqstan Sıanda logıstıkalyq ortalyǵyn ashty. Onyń qurylysy 2023 jyldyń mamyrynda bastalyp, 2024 jyldyń aqpanynda paıdalanýǵa berildi.
«QTJ» UK AQ baspasóz qyzmetiniń málimetinshe, Sıan qalasyndaǵy termınaldyń jobalyq qýaty jylyna 66,5 myń jıyrma fýt ekvıvalentke teń. Al aýdany — 6,7 gektar. Bul ortalyq Qazaqstan taýarlaryn Sıandy Qorǵas, Alashankoý jáne Tachen portymen tasymaldaý, Qytaı taýaryn Eýropaǵa jetkizýge septigin tıgizedi.
Gýanchjoýdaǵy Bas konsýldyq
Yntymaqtastyqty keńeıtý jańa dıplomatııalyq alańdardy da talap etedi. 2025 jylǵy mamyrda Qazaqstan men Qytaı Syrtqy ister mınıstrleriniń Almatydaǵy kezdesýi aıasynda Ońtústik Qytaıdyń negizgi iskerlik ortalyǵy Gýanchjoýda Qazaqstannyń Bas konsýldyǵyn ashý týraly kelisimge qol qoıylǵany týraly habarlandy.
Bul keńseniń qashan ashylatyny ázirge belgisiz. Qazir Qazaqstannyń Beıjińdegi elshiligi, Shanhaı men Sıandaǵy bas konsýldyqtary, sondaı-aq Úrimshi qalasyndaǵy pasport-vızalyq qyzmet qazaqstandyqtarǵa kómek kórsetedi.
Mádenı-gýmanıtarlyq jobalar
2025 jyldyń maýsym aıynda Beıjińde Qazaqstannyń Qytaıdaǵy mádenı ortalyǵy ashyldy. Munda kitaphana, kórme jáne konferentsııa zaldary, shyǵarmashylyqqa, qolónerge jáne qazaq tilin úırenýge arnalǵan bólimder bar. Sondaı-aq, Qytaı aýdıtorııasyna arnalǵan kontsertter, kórmeler, kıno kórsetilimderi, festıvaldar men dárister ótedi.
Buǵan deıin Qazaqstan-Qytaı arasyndaǵy ekonomıkalyq baılanysqa sholý usynǵan edik.