Qazaqstan Qytaı bankiniń qarajatyna keden beketterin jańǵyrtyp jatyr

ASTANA. KAZINFORM – Qazaqstannyń Qytaımen, Ózbekstanmen jáne Túrikmenstanmen shekarasyndaǵy ótkizý beketteri tolyqqandy jańǵyrtylyp jatyr.

QR Qarjy mınıstrligi Memlekettik kirister komıteti Kedendik baqylaý departamentiniń dırektory Eldos Saýdabaevtyń aıtýynsha, jańǵyrtý jumystary Qytaı Eksımbankiniń jeńildetilgen úkimettik qaryzy esebinen júrgizilip jatyr. 

Atap aıtqanda, «Ózbekstanmen shekarada «Qaplanbek», «Qazyǵurt», «Atameken» jáne «Tájen»; Qytaımen shekarada – «Dostyq-avtomobıl», «Qaljat», «Maıqapshaǵaı» jáne «Baqty»; Túrkimenstanmen shekarada – «Temir baba» ótkizý beketteri jańartylady.

Ózbek tarapynyń kelisimimen «Qaplanbek» jáne «Zangıota» avtomobıl ótkizý pýnktteri rekonstrýktsııalaýǵa tolyǵymen jabyldy. Qalǵan ótkizý pýnktteri jabylmaıdy, biraq avtokólik pen jeke tulǵalardyń qozǵalysy shekteledi.

«Bir beketti salýǵa orta eseppen 15 mlrd teńge bólinedi. Sonymen qatar, bul 8 jolaq bolatyn jańartylǵan zamanaýı beket bolatynyn aıtqym keledi. Shamamen qurylys kestesi jyl sońyna deıin josparlanǵan. Búginde «Qazyǵurt» jáne «Atameken» keden beketteri 70-80%-ǵa jańartylǵan», - dedi E. Saýdabaev.

Sondaı-aq, jobany iske asyrý sheńberinde ótkizý qabileti 8 esege ulǵaıtylady jáne ýaqyty 2 saǵat 25 mınýtqa deıin qysqaryp, sybaılas jemqorlyq táýekelderi azaıady.