Qazaqstan-Qytaı arasyndaǵy taýar aınalymy 43,8 mlrd dollarǵa jetti
ASTANA. KAZINFORM — Oljas Bektenov QHR-nyń Qazaqstandaǵy Elshisi Han Chýnlınmen saýda-ekonomıkalyq yntymaqtastyq máselelerin talqylady, dep habarlaıdy Úkimettiń baspasóz qyzmeti.
Premer-mınıstr Oljas Bektenov Qazaqstan Respýblıkasyndaǵy dıplomatııalyq mıssııasyn bastaǵan Qytaı Halyq Respýblıkasynyń Qazaqstandaǵy Tótenshe jáne Ókiletti Elshisi Han Chýnlınmen kezdesti.
Saýda-ekonomıkalyq yntymaqtastyq, ınvestıtsııa, AÓK, kólik jáne logıstıka, energetıka, mádenı-gýmanıtarlyq sala, týrızm jáne basqa da salalardaǵy ózara is-qımyldy keńeıtý máseleleri talqylandy.
Premer-mınıstr Qazaqstan Prezıdenti Qasym-Jomart Toqaev pen QHR Tóraǵasy Sı Tszınpın arasyndaǵy qarqyndy jáne senimdi baılanystar serpindi ekonomıkalyq yntymaqtastyqtyń negizi ekenin basa aıtty.
Kelissózder barysynda taraptar eki el arasyndaǵy saýda-ekonomıkalyq áriptestiktiń qalyptasqan joǵary deńgeıin atap ótti.
— 2024 jyldyń qorytyndysy boıynsha ekijaqty taýar aınalymy 9%-ǵa ósip, $43,8 mlrd-qa jetti. Eki memleket basshylary qoıǵan ózara saýda kólemin eki esege arttyrý jónindegi mindetterge qol jetkizý maqsatynda úkimetter taýar aınalymyn ártaraptandyrýǵa baǵyttalǵan qolda bar áleýetti keńeıtý boıynsha birlesken jumys júrgizýde. Osyǵan baılanysty qazaqstandyq tarap jetkiziletin ónim nomenklatýrasyn odan ári keńeıtýdiń, onyń ishinde, qytaı tarapynyń astyq júkterin vagondardyń barlyq túri boıynsha qabyldaýyn ulǵaıtý, sondaı-aq QHR-ǵa eksporttaýshylar tizilimine jańa qazaqstandyq kásiporyndardy engizý arqyly Qytaı naryǵyna qazaqstandyq astyqtyń eksportyn arttyrýdyń mańyzdylyǵyn atap ótti, — delingen habarlamada.
Budan basqa, birlesken ınvestıtsııalyq jobalardy iske asyrý máseleleri qaraldy. Qytaı Qazaqstannyń 5 úzdik ınvestorynyń qataryna kiredi. Búgingi tańda 11 myń jumys orny ashý arqyly $8,7 mlrd-qa 62 Qazaqstan-Qytaı jobasy iske asyryldy, 17,4 myń jumys ornyn ashatyn 13,5 mlrd-qa 55 joba iske asyrý satysynda. Jalpy pýlǵa $60,5 mlrd-tan astam 222 ınvestıtsııalyq joba kiredi.
Sondaı-aq tranzıttik-kólik salasyndaǵy yntymaqtastyqty nyǵaıtýǵa basa nazar aýdaryldy. «QTJ» UK» AQ derekteri boıynsha 2024 jyldyń 11 aıynda Qazaqstan men QHR arasynda júk tasymaldaý kólemi 2023 jyldyń sáıkes kezeńimen salystyrǵanda 13%-ǵa ósip, 29,3 mln tonnany qurady. Júk tasymalyn odan ári arttyrý úshin qazaq-qytaı shekarasynda jańa ótkizý pýnktterin ashý jáne qoldanystaǵy ótkizý pýnktterin jańǵyrtý, sondaı-aq shekara mańyndaǵy keme qatynasyn damytý jóninde birlesken sharalar qabyldaýdyń mańyzy naqtylandy.
Kezdesý qorytyndysy boıynsha taraptar ekijaqty ózara is-qımyldyń barlyq negizgi baǵyttary boıynsha áriptestikti nyǵaıtý jáne birlesken jumysty kúsheıtý nıetterin rastady.
Osyǵan deıin Premer-mınıstr Oljas Bektenov ekonomıka jáne kásipkerlik salasyndaǵy sarapshylar qaýymdastyǵynyń ókilderimen kezdestkenin habarladyq.