Qazaqstan kitaphanashylary Ońtústik Koreıa tájirıbesin qabyldamaq
ASTANA. QazAqparat - Búgin elordadaǵy QR Ulttyq akademııalyq kitaphanasynda Ońtústik Koreıadan kelgen professor Kımniń qatysýmen kitaphanashylarǵa arnalǵan semınar ótýde.
«QR Prezıdenti Nursultan Nazarbaev aıqyndap bergen 100 naqty qadamdy júzege asyrý maqsatynda bizdiń kitaphanamyzda kitaphanashylardy daıyndaýǵa baǵyttalǵan jumys bastaldy», - dep atap ótti BAQ ókilderine suhbat bergen QR UAK aqparattyq-bıblıografııalyq servıs qyzmetiniń jetekshisi Sáýle Nazyrova.
Onyń sózine qaraǵanda, mundaı semınar kitaphana ǵımaratynda sheteldik qonaqtyń qatysýmen alǵash ret uıymdastyrylyp otyr.
«Koreıanyń Hanıan ýnıversıtetiniń kitaphana isi jónindegi professory doktor Kım keldi. Ol aqparattandyrý taqyrybynda dáris oqıdy. Óıtkeni, bizdiń kitaphana elektrondy túrde jasaqtalǵan. Ári qazirgi kúni barlyq oblys ortalyqtaryndaǵy kitaphanalar óz qorlaryn sandyq formatqa kóshirip jatyr. Demek, bul dáristiń taqyryby bizder úshin barynsha ózekti», - dedi ol.
Sonymen qatar onyń atap ótýinshe, sheteldik ǵalym semınar barysynda kitaphana salasyndaǵy menedjment, marketıng jáne ınnovatsııalar boıynsha da dáris beredi.
«Semınarǵa Aqtóbe, Pavlodar jáne Ońtústik Qazaqstan oblysynyń ókilderi qatysýda. Dáris úsh kúnge sozylady. Qorytyndysynda qatysýshylarǵa halyqaralyq úlgidegi sertıfıkat tabys etiledi», - dedi S.Nazyrova.
