Qazaqstan Qysqy Olımpıadaǵa qansha lıtsenzııamen barady
ASTANA.KAZINFORM – 2026 jylǵy XXV qysqy Olımpıada oıyndarynyń bastalýyna az ýaqyt qaldy. Italııanyń Mılan men Kortına-d’Ampetstso qalalarynda ótetin dúbirli dodaǵa Qazaqstan quramasynyń qalaı daıyndalyp jatqany belgili boldy.
QR Týrızm jáne sport mınıstrligi Sportty damytý dırektsııasynyń qoǵammen baılanys bóliminiń ókili Turlyjan Áıtenovtiń aıtýynsha, dál qazirgi tańda Qazaqstan qorjynynda 23 lıtsenzııa bar.
– Qazir ulttyq quramanyń enshisinde 23 lıtsenzııa bar. Onyń 2-eýi - mánerlep syrǵanaýdan, 9-y – short-trekten, 12-si – konkımen júgirýden. Qalǵan sport túrleri boıynsha irikteý áli jalǵasyp jatyr, – dedi ol Jibek Joly telearnasynyń «Bugin LIVE» baǵdarlamasynda.
Onyń aıtýynsha, lıtsenzııalyq týrnırlerdiń basym bóligi qańtar aıynyń sońyna deıin aıaqtalady. Sonyń nátıjesinde Qazaqstan jalpy 90-ǵa jýyq lıtsenzııaǵa qol jetkizýi múmkin. Alaıda Olımpıadaǵa baratyn sportshylar sany lıtsenzııadan áldeqaıda az bolady.
– Bir sportshy birneshe qashyqtyqta nemese birneshe dıstsıplınada óner kórsete alady. Mysaly, short-trekte 4 sportshy baryp, 9 lıtsenzııany paıdalanady. Sondyqtan shamamen 30–35 sportshy Olımpıadaǵa attanady dep josparlap otyrmyz, – dedi mınıstrlik ókili.
Turlyjan Áıtenov 2022 jyly Beıjińde ótken qysqy Olımpıadamen salystyra otyryp, odan keıin sheteldik keńesshi mamandardy da tartqanyn atap ótti.
– Beıjiń Olımpıadasynda 30-dan asa sportshy qatysqanymen, lıtsenzııa sany 7 ǵana boldy. Ókinishke qaraı, júldesiz oraldyq. Qazir basty maqsat – kóbirek sportshy qatystyrý emes, sapaǵa jumys isteý, kem degende bir medal alý. Qaı sport túri qaı elde jaqsy damysa, sol elden mamandar shaqyryldy. Olar kúndelikti jattyǵý protsesine tikeleı qatysyp jatyr, – dedi ol.
Mınıstrlik ókiliniń aıtýynsha, bıatlon, shańǵy jarysy, frıstaıl-mogýl jáne frıstaıl-akrobatıka sekildi sport túrlerinen lıtsenzııalyq irikteý áli aıaqtalǵan joq. Álem kýboktary bitken soń halyqaralyq reıtıng jarııalanyp, úzdik sportshylar Olımpıada joldamasyn alady.
Al ulttyq quramalardyń daıyndyǵy maýsym boıy Eýropada ótetin álem kýboktary arqyly júrgiziledi. Olımpıadaǵa sportshylar jarys bastalardan bir apta buryn baryp, jergilikti klımatqa beıimdeledi.
– Barlyq quramalar oqý-jattyǵý jıyndarymen, testilik jarystarmen qamtamasyz etiledi. Ár komandamen birge dáriger, massajıst, psıholog jumys isteıdi. Bul júıe tolyq jolǵa qoıylǵan, – dedi mınıstrlik ókili.
Aıta keteıik, memleket tarapynan Olımpıada júldegerlerine qomaqty syıaqy qarastyrylǵan. Altyn medal úshin – 250 myń dollar, kúmis úshin – 150 myń dollar, qola júldege – 75 myń dollar tólenedi. Tipti 5-orynǵa deıin yntalandyrý syıaqysy bar.
Dúbirli doda 6-22 aqpan aralyǵynda ótedi.
Buǵan deıin bıletterdi qaıdan jáne qalaı satyp alýǵa bolatynyn jazǵan edik.