Qazaqstan kisi ólimi qylmysy kórsetkishiniń álemdik reıtınginde 96-orynda tur - Bas prokýratýra
ASTANA. QazAqparat - Qazaqstan kisi ólimi qylmysy kórsetkishiniń álemdik reıtınginde 96-orynda tur. Búgin Zańdylyqty qamtamasyz etý, quqyqtyq tártip jáne qylmyspen kúres jónindegi Úılestirý keńesiniń kezekti otyrysynda QR Bas prokýrorynyń orynbasary Nurmuhanbet Isaev osylaı málim etti.
«Búkil álemde 100 myń adamǵa shaqqandaǵy kisi óltirý qylmysynyń kórsetkishi turǵyndardyń jalpy qaýipsizdigin baǵalaý deńgeıiniń bazalyq kórsetkishi bolyp tabylady. Al BUU málimetteri boıynsha reıtıngke qatysqan 207 memlekettiń ishinde Qazaqstan 100 myń adamǵa shaqqanda 6,6 kisi ólimi qylmysymen 96-shy orynda tur. Al bizdiń kórshimiz Reseı 10,2 kórsetkishimen 72-orynda», - dedi N. Isaev.
Onyń sózine qaraǵanda, Jahandyq básekege qabilettilik esebiniń 2012 jylǵy qorytyndylary boıynsha Qazaqstan polıtseılik qyzmettiń senimdiligi kórsetkishinde de 96-orynda tur.
«Quqyq qorǵaý júıesin odan ári jańǵyrtýdyń memlekettik baǵdarlamasyna sáıkes, Qazaqstan dál osy kórsetkish boıynsha 2020 jylǵa qaraı 56-orynǵa jetýi tıis. Sonymen qatar, baǵdarlama boıynsha azamattardyń quqyq qorǵaý organdaryna senimdiligin 60 paıyzǵa jetkizýimiz kerek. Eger Quqyqtyq statıstıka komıtetindegi elektrondyq daýys berý nátıjelerine súıensek, onda polıtseılerdiń jumysyna azamattardyń 10 paıyzy ǵana qanaǵattanarlyq bildiredi. Endeshe, bizdiń atqaratyn jumysymyz áli de aıtarlyqtaı», - dedi Bas prokýror orynbasary.
