Qazaqstan qyrkúıek aıynda bes tonna altyn satyp aldy
ASTANA. KAZINFORM — Qazaqstan 2026 jylǵy qyrkúıekte halyqaralyq rezervterin tolyqtyrý úshin bes tonna altyn satyp aldy. Bul týraly Dúnıejúzilik altyn keńesiniń (World Gold Council, WGC) esebinde aıtylǵan, dep habarlaıdy Kazinform agenttiginiń tilshisi.
Uıymnyń málimetinshe, Qazaqstan álemniń ortalyq bankteri arasynda altyndy eń kóp satyp alǵan elderdiń qataryna endi. Qyrkúıek aıynda eń kóp altyn satyp alǵan elder — Polsha men Qytaı. Olar tıisinshe 25 jáne 23 tonna altyn qoryn tolyqtyrǵan.
Sondaı-aq qyrkúıekte Ózbekstan (+7 tonna), Iordanııa (+4 tonna), Chehııa (+2 tonna) jáne Bolıvııa (+1 tonna) da altyndy taza satyp alýshylar qatarynda boldy.
Jalpy, álemniń ortalyq bankteri qyrkúıek aıynda 61 tonna altyn satyp aldy. Bul — 2026 jyldyń basynan bergi eń joǵary aılyq kórsetkish.
Al jyl basynan beri álemniń ortalyq bankteri altyndy taza satyp alý kólemin 228 tonnaǵa jetkizdi. Bul ótken jyldyń sáıkes kezeńimen salystyrǵanda 7%-ǵa az.
Buǵan deıin Dýbaıda salmaǵy 16,5 keli tartatyn altyn syrǵa Gınnestiń rekordtar kitabyna engenin jazǵan bolatynbyz.
