Qazaqstan Qyrǵyzstannyń benzın jetkizý jónindegi ótinishin qarastyryp jatyr
ASTANA. KAZINFORM — Qyrǵyzstan tarapynan Qazaqstanǵa benzın jetkizý jóninde resmı ótinish tústi. Qazirgi ýaqytta bul másele qarastyrylyp jatyr. Bul týraly brıfıng barysynda jýrnalısterdiń saýalyna jaýap bergen QR Energetıka vıtse-mınıstri Qaıyrhan Tutqyshbaev málim etti.
Jýrnalıster Qazaqstannan Qyrǵyzstan men Reseı benzın surap otyrǵany, sondaı-aq Atyraý munaı óńdeý zaýytynyń jóndeý jumystaryna baılanysty jabylǵany týraly surady.
Vıtse-mınıstr Qyrǵyzstan tarapynan otyn jetkizý boıynsha resmı suranys túskenin aıtty.
— Reseı Federatsııasy tarapynan bizge eshqandaı resmı suranys kelgen joq. Al Qyrǵyzstan tarapynan resmı ótinish tústi. Qazir ony qarastyryp jatyrmyz. Barlyq sheshim ulttyq múddelerimizdi eskere otyryp qabyldanady, — dedi Qaıyrhan Tutqyshbaev.
Onyń aıtýynsha, kórshi elderdiń suranysyna baılanysty qabyldanatyn sheshimder Qazaqstannyń ishki naryǵyndaǵy janar-jaǵarmaı baǵasynyń kúrt ósýine áser etpeıdi.
— Qandaı da bir suranystar bizdiń ishki naryqtaǵy janar-jaǵarmaı baǵasynyń kenetten ósýine jol bermeıdi. Bul másele ishki naryqtaǵy teńgerimdi eskere otyryp sheshiledi, — dedi ol.
Vıtse-mınıstr Qyrǵyzstannyń ótinishi jaqyn arada jan-jaqty qaralyp, tıisti jaýap beriletinin atap ótti.
Sonymen qatar brıfıng barysynda jýrnalıster Teńiz ken ornyndaǵy tehnıkalyq máselelerge baılanysty gaz óndirisiniń tómendeýi ishki naryqqa áser ete me degen saýal qoıdy.
Qaıyrhan Tutqyshbaev jyldyń basynan beri Teńiz ken ornynda birqatar tehnıkalyq aqaý bolǵanyn rastady. Sonyń saldarynan munaı jáne gaz óndirisiniń kólemi tómendegen.
— QazaqGaz ulttyq kompanııasy tıisti sharalardy qabyldaǵannan keıin eshqandaı shekteý nemese gaz tapshylyǵy bolǵan joq. Sol sebepti mundaı jaǵdaılardyń qaıtalanbaýy úshin qazirgi tańda Teńiz ken ornynyń quryltaıshylarymen tıisti jumys jalǵasyp jatyr, — dep tolyqtyrdy vıtse-mınıstr.
Onyń aıtýynsha, qazirgi tańda Qazaqstannyń ishki naryǵynda gaz tapshylyǵy bolýy múmkin degen boljam joq.
Aıta keteıik, Reseı Qazaqstanǵa otyn satyp alý týraly ótinishi jaıly jazǵanbyz.
