Qazaqstan Qyrǵyzstannan Elshilikke arnalǵan jer ýchaskesin alady
ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń Úkimeti men Qyrǵyz Respýblıkasynyń Mınıstrler Kabıneti arasyndaǵy eki el Elshilikteriniń, sondaı-aq Elshileriniń rezıdentsııalarynyń muqtajdyqtary úshin Astana men Bishkek qalasyndaǵy ǵımarattardy jáne jer ýchaskelerin ózara óteýsiz paıdalanýǵa berý týraly kelisimdi ratıfıkatsııalaý týraly» Zań maquldandy.
— Zań Qazaqstan Respýblıkasy Úkimeti men Qyrǵyz Respýblıkasy Mınıstrler Kabıneti arasyndaǵy eki memlekettiń elshilikterin, sondaı-aq Tótenshe jáne Ókiletti Elshilerdiń resmı rezıdentsııalaryn ornalastyrý úshin Astana jáne Bishkek qalalarynda ǵımarattar men jer ýchaskelerin ózara óteýsiz paıdalanýǵa berý týraly kelisimdi ratıfıkatsııalaýdy kózdeıdi. Kelisimge 2025 jylǵy 22 tamyzda Qazaqstan Respýblıkasynyń Prezıdenti Qasym-Jomart Toqaev Qyrǵyz Respýblıkasyna resmı sapary aıasynda Bishkek qalasynda qol qoıyldy. Kelisimniń negizgi maqsaty — eki eldiń dıplomatııalyq ókildikteriniń, sondaı-aq eki memlekettiń Tótenshe jáne Ókiletti Elshileriniń resmı rezıdentsııalarynyń qyzmeti úshin tıisti jaǵdaılar jasaý, — dedi senator Ǵalıasqar Sarybaev.
Qujat Astana jáne Bishkek qalalaryndaǵy ǵımarattar men jer ýchaskelerin quqyqtyq rásimdeýdi kózdeı otyryp, olardy uzartý quqyǵymen 49 jyl merzimge ózara óteýsiz paıdalanýǵa berý máselelerin retteıdi. Atap aıtqanda, Qazaqstannyń Qyrǵyz Respýblıkasyndaǵy Elshiligine aýdany 0,75 gektar jer ýchaskesi, al Qazaqstan Elshisiniń rezıdentsııasy úshin jalpy aýdany 531,66 sharshy metr bolatyn kottedj jáne oǵan irgeles 0,17 gektar aýmaq bólinedi.
— Óz kezeginde Qyrǵyz Respýblıkasynyń Qazaqstan Respýblıkasyndaǵy Elshiligine aýdany 0,74 gektar jer ýchaskesi, al Qyrǵyzstan Elshisiniń rezıdentsııasy úshin aýdany 1 267,8 sharshy metr kóleminde kottedj jáne oǵan irgeles 0,125 gektar aýmaq beriledi. Kelisimniń negizgi erejeleri beriletin jyljymaıtyn múlik obektilerin aıqyndaıdy, olardyń dıplomatııalyq mártebesin bekitedi, atalǵan múlikti qabyldaýshy memlekettegi barlyq salyq pen alymdardan bosatýdy belgileıdi, múlikti kútip-ustaýǵa, jóndeý jumystaryn júrgizýge, kommýnaldyq qyzmetterdi, baılanys pen ınternetti jáne ózge de paıdalaný shyǵyndaryn tóleý jónindegi mindetterdi qabyldaýshy tarapqa júkteıdi. Sonymen qatar qujatta ınjenerlik ınfraqurylymmen qamtamasyz etý jáne dıplomatııalyq obektilerdi salýǵa qajetti ruqsat qujattaryn alýǵa járdem kórsetý tártibin usynady, taraptardyń beriletin múlikke úshinshi tulǵalardyń quqyqtarynyń joq ekendigine qatysty kepildikterin qamtıdy, — dedi depýtat.
Osy Kelisim kúshine engen kúnnen bastap Qazaqstan Respýblıkasy Úkimeti men Qyrǵyz Respýblıkasy Úkimeti arasyndaǵy 2005 jylǵy 10 tamyzdaǵy osyǵan uqsas kelisimniń kúshi joıylady.
— Kelisim Qazaqstan-Qyrǵyzstan qatynastaryn damytýdyń mańyzdy elementi sanalady jáne eki memleket arasyndaǵy ózara senimniń joǵary deńgeıin kórsetedi, — dedi senator.
Buǵan deıin Qazaqstan men Qyrǵyzstan bir-birine Elshilikteri úshin jer ýchaskelerin óteýsiz beretinin jazǵan edik.
