Qazaqstan Qyrǵyzstanǵa 2025-2026 jyldary 1,56 mlrd kVt·saǵat elektr energııasyn jetkizdi
ASTANA. KAZINFORM – Bishkekte vegetatsııalyq kezeń aldynda Ortalyq Azııadaǵy sý-energetıkalyq júıeleriniń turaqty jumysyn qamtamasyz etý máseleleri talqylandy.
Kezdesýge Qyrǵyzstannyń energetıka mınıstri Taalaıbek Ibraev, Ózbekstannyń energetıka mınıstri Jýrabek Mırzamahmýdov, sý sharýashylyǵy mınıstri Shavkat Hamraev jáne Tájikstannyń energetıka jáne sý resýrstary mınıstri Daler Djýma qatysty.
Qazaqstan delegatsııasyn Energetıka mınıstri Erlan Aqkenjenov pen Sý resýrstary jáne ırrıgatsııa mınıstri Nurjan Nurjigitov basqardy. Jıynǵa sondaı-aq «KEGOC» AQ júıelik operatory men «JEK jónindegi QEO» JShS basshylary, sondaı-aq seriktes elderdiń sý salasyndaǵy vedomstvolar ókilderi qatysty.
Basqosý barysynda óńir elderiniń ózara mindettemeleri basty nazarǵa alyndy. Taraptar Ortalyq Azııa energojúıeleriniń tarıhı turǵydan tyǵyz baılanysta ekenin, bir eldegi turaqsyzdyqtyń búkil makroóńirge áser etetinin atap ótti.
Qazaqstan Qyrǵyz Respýblıkasynyń elektr energııasy tapshylyǵyn joıýǵa qoldaý kórsetýin jalǵastyrýǵa daıyn ekenin bildirdi. Energetıka mınıstri Erlan Aqkenjenovtiń málimetinshe, 2025 jylǵy qyrkúıek pen 2026 jylǵy sáýir aralyǵynda Qyrǵyzstanǵa 1 560 mln kVt·saǵattan astam elektr energııasy jetkizildi.
Mınıstrdiń aıtýynsha, bul elektr energııasy almasýy jazǵy maýsymǵa qajetti sý qoryn jınaqtaý úshin Toqtoǵul sý qoımasyndaǵy sý deńgeıin saqtaýǵa múmkindik berdi. Sonymen qatar, óńirdegi turaqty tepe-teńdikti qamtamasyz etý úshin barlyq taraptyń buryn jasalǵan sý-energetıkalyq kelisimderdi qatań oryndaýy mańyzdy ekeni atap ótildi.
Sarapshy toptar tehnıkalyq máseleler boıynsha konsýltatsııalar ótkizip, derektermen almasqan. Aldaǵy kezeńdegi júktemelerdi naqty josparlaý qajettigi eskerilip, taraptar energojúıelerdiń jumys rejımine qatysty tehnıkalyq parametrler men tsıfrlyq kórsetkishterdi kelisý jumystaryn jalǵastyrýǵa kelisti.
Qol jetkizilgen kelisimderdi naqtylaý jáne ózara is-qımyldy úılestirý mamyr aıynda Tashkentte jáne maýsym aıynda Bishkekte ótetin mınıstrler deńgeıindegi kezdesýlerde jalǵasady.
Aıta keteıik, osyǵan deıin óńirlik ekologııalyq sammıt aıasynda Energetıka mınıstrligi men «Karaganda Wind Power» kompanııasy arasynda 500 MVt jel elektr stantsııasyn salý jóninde ınvestıtsııalyq kelisim jasalǵanyn jazǵanbyz.
