Qazaqstan, Qyrǵyzstan jáne Ózbekstan sý-energetıkalyq yntymaqtastyqty kúsheıtpek
ASTANA. KAZINFORM — Ózbekstan astanasynda Qazaqstan, Qyrǵyzstan jáne Ózbekstan energetıka mınıstrleriniń úshjaqty kezdesýi, sondaı-aq úsh eldiń sý-energetıka salasyna jaýapty vedomstvolary basshylarynyń otyrysy ótti, dep habarlaıdy Energetıka mınıstrliginiń baspasóz qyzmeti.
Kelissózderge Qazaqstan Respýblıkasynyń Energetıka mınıstri Erlan Aqkenjenov, Qyrǵyz Respýblıkasynyń Energetıka mınıstri Taalaıbek Ibraev, Ózbekstan Respýblıkasynyń Energetıka mınıstri Jýrabek Mırzamahmýdov qatysty. Sondaı-aq otyrysqa Tájikstannyń Energetıka mınıstri Daler Djýma shaqyryldy.
Taraptar sý-energetıkalyq resýrstardy basqarý salasyndaǵy úshjaqty ózara is-qımyldyń qazirgi jaǵdaıy men perspektıvalaryn, sondaı-aq óńirlik energojúıeniń turaqty ári teńgerimdi jumysyn qamtamasyz etý máselelerin talqylady.
Generatsııalaýshy qýattardyń jumys rejımderin úılestirýge, sý paıdalaný boıynsha kelisilgen parametrlerdi saqtaýǵa jáne ortaq tásilderdi ázirleýge erekshe nazar aýdaryldy.
— Kezdesýde maýsymdyq júktemeler kezeńinde ózara qoldaý men jedel ózara is-qımyldyń mańyzdylyǵy, sondaı-aq energetıkalyq qaýipsizdik múddesinde transshekaralyq ózenderdiń turaqty sý rejımin saqtaý qajettigi atap ótildi. Taraptar Ortalyq Azııanyń sý-energetıkalyq júıesiniń senimdiligin nyǵaıtýǵa baǵyttalǵan syndarly dıalogty jáne tatý kórshilik rýhyndaǵy birlesken jumysty jalǵastyrýǵa beıildiligin rastady, — delingen habarlamada.
Otyrys qorytyndysy boıynsha qol jetkizilgen ýaǵdalastyqtardy bekitetin úshjaqty hattamaǵa qol qoıyldy.
Budan buryn Prezıdent Energetıka mınıstrliginiń burynǵy basshylaryn synǵa aldy.