Qazaqstan, Qyrǵyzstan jáne Ózbekstan sý-energetıkalyq yntymaqtastyqty kúsheıtpek
ASTANA. KAZINFORM — Qazaqstan, Qyrǵyzstan jáne Ózbekstan sý-energetıkalyq yntymaqtastyq parametrleri men ózara qoldaý týraly kelisimge keldi, dep habarlaıdy Energetıka mınıstrliginiń baspasóz qyzmeti.
Almatyda QR Energetıka mınıstri Erlan Aqkenjenovtyń tóraǵalyǵymen Qazaqstan, Qyrǵyzstan jáne Ózbekstannyń sý-energetıka salasyna jaýapty vedomstvolary basshylarynyń otyrysy ótti.
Kelissózderge QR Sý resýrstary jáne ırrıgatsııa mınıstri Nurjan Nurjigitov, Qyrǵyzstannyń Energetıka mınıstri Taalaıbek Ibraev, Ózbekstannyń Energetıka mınıstri Jýrabek Mırzamahmýdov, Ózbekstannyń Sý sharýashylyǵy mınıstri Shavkat Hamraev jáne Qyrǵyzstannyń Sý resýrstary, aýyl sharýashylyǵy jáne qaıta óńdeý ónerkásibi mınıstriniń orynbasary Almaz Jeenalıev qatysty.
— Taraptar sý-energetıkalyq yntymaqtastyqty odan ári damytý parametrleri boıynsha kelisimge keldi. Toqtaǵul sý qoımasyndaǵy kúrdeli jaǵdaıdy eskere otyryp, qatysýshylar bir-birine ózara elektr energııasyn jetkizý arqyly qoldaý kórsetýge jáne aldaǵy jylytý maýsymyn, sondaı-aq keler vegetatsııalyq kezeńge daıyndyqty úılestirýge ýaǵdalasty, — delingen habarlamada.
Qazaqstan men Ózbekstan kúz-qys mezgilinde Qyrǵyzstanǵa elektr energııasyn jetkizýge daıyn ekenin rastady. Bul qyrǵyz tarapyna qys kezinde elektr energııasyn óndirý kólemin azaıtyp, Toqtaǵul sý qoımasynda sý jınaýǵa múmkindik beredi. Jınalǵan sý kólemi vegetatsııa kezeńinde Qazaqstan men Ózbekstanǵa baǵyttalyp, ońtústik óńirlerdiń aýyl sharýashylyǵy alqaptaryn turaqty sýarýmen qamtamasyz etedi.
Sonymen qatar, óńirde tutynýdy azaıtý jáne energııa únemdeý boıynsha birlesken sharalar qabyldaý týraly kelisimge qol jetkizildi. Kelissózderge qatysýshylar jumystyń dostyq jáne ózara túsinistik rýhynda júrgizilip jatqanyn, onyń búkil Ortalyq Azııadaǵy energetıkalyq qaýipsizdik pen turaqtylyqty nyǵaıtýǵa baǵyttalǵanyn atap ótti.
Ózbekstan tarapy sondaı-aq energııa júıesiniń tranzıti, jetkizilimderi jáne teńgerimin tehnıkalyq qamtamasyz etýge daıyn ekenin bildirdi. Otyrys qorytyndysy boıynsha 2025–2026 jyldardaǵy qysqy elektr energııasy jetkizilimderiniń kólemin jáne 2026 jylǵy vegetatsııalyq kezeńge sý jınaýdy quqyqtyq turǵydan bekitetin úshjaqty hattamaǵa qol qoıyldy.