Qazaqstan, Qyrǵyzstan jáne Ózbekstan sý-energetıkalyq yntymaqtastyq máselesin talqylady
ASTANA.KAZINFORM — Bishkekte Qazaqstan, Qyrǵyzstan jáne Ózbekstannyń energetıkalyq jáne sý sharýashylyǵy vedomstvolary ókilderiniń jumys kezdesýi ótti, dep habarlaıdy Kazinform agenttiginiń Bishkektegi menshikti tilshisi.
Energetıka mınıstrliginiń málimetinshe, otyrys barysynda taraptar 2026-2027 jyldardaǵy vegetatsııalyq jáne kúzgi-qysqy kezeńderde óńirdiń sý-energetıkalyq júıeleriniń turaqty jáne kelisilgen jumysyn qamtamasyz etý máselelerin talqylady.
Delegatsııalar kelisilgen kestelerdi saqtaý, óńir elderi arasynda elektr energııasyn ózara jetkizý, sondaı-aq aldaǵy jylytý maýsymynyń sátti ótýi úshin birlesken kúsh-jigerdi úılestirý týraly kelisti.
Kezdesýge qatysýshylar óńirlik energetıkalyq júıeniń turaqtylyǵyn qamtamasyz etý úshin birlesken is-qımyldardyń mańyzdylyǵyn atap ótip, ózara tıimdi jáne syndarly yntymaqtastyqty odan ári damytýǵa daıyn ekendikterin bildirdi.
Kelissózder qorytyndysy boıynsha taraptar birlesken is-qımyl týraly tıisti Hattamaǵa qol qoıdy.
Buǵan deıin Qytaı Qyrǵyzstannyń «jasyl» energetıkasyna 1 mıllıard dollarǵa deıin ınvestıtsııa salýǵa daıyn ekendigi habarlanǵan bolatyn.
