Qazaqstan, Qyrǵyzstan, Reseı jáne Tájikstan áskerıleri birlesken oqý-jattyǵýǵa kiristi
ASTANA. KAZINFORM – Jetisý oblysyndaǵy «Kóktal» oqý-jattyǵý polıgonynda Ujymdyq qaýipsizdik týraly shart uıymynyń Ortalyq Azııa óńiri Ujymdyq jedel óristetý kúshteriniń «Shep-2026» birlesken oqý-jattyǵýynyń belsendi kezeńi bastaldy, dep habarlaıdy QR Qorǵanys mınıstrligi.
Oqý-jattyǵýǵa Qazaqstan, Qyrǵyzstan, Reseı jáne Tájikstan áskerı qyzmetshileri qatysyp jatyr. Olar birlesken daıarlyqty, basqarý organdary men ulttyq kontıngentterdiń ózara is-qımylyn pysyqtaıdy.
«Shep» oqý-jattyǵýy jyl saıyn ótkiziledi. Onyń negizgi maqsaty – Ujymdyq jedel óristetý kúshteriniń ózara is-qımyl deńgeıin jáne birlesken mindetterdi oryndaýǵa ázirligin arttyrý.
Saltanatty ashylý rásimine UQShU Bas hatshysynyń orynbasary Mırlan Turǵynbekov, Qazaqstan Qarýly kúshteri Bas shtaby bastyǵynyń orynbasary general-maıor Asqar Jolamanov, UQShU Birikken shtaby bastyǵynyń orynbasary general-leıtenant Rýslan Shpekbaev jáne basqa da laýazymdy tulǵalar qatysty.
– Oqý-jattyǵý 13-18 qyrkúıek aralyǵynda Qazaqstan Respýblıkasy Qarýly kúshteri Desanttyq-shabýyldaý áskerleriniń qolbasshysy polkovnık Maqsut Gýseınovtiń basshylyǵymen ótedi. Oǵan 1500-ge jýyq áskerı qyzmetshi jáne 300-den astam qarý-jaraq, áskerı jáne arnaıy tehnıka, onyń ishinde 115 ushqyshsyz ushý apparaty tartyldy, – delingen aqparatta.
Praktıkalyq is-qımyldar taýly-shóleıt jerlerdiń erekshelikterin eskere otyryp júrgiziledi.
Oqý-jattyǵý kezinde Qazaqstannyń Shekara qyzmeti jáne Ulttyq ulan bólimshelerimen ózara is-qımyl jasaýǵa da basa nazar aýdarylyp otyr.
Aıta keteıik, Kaspııde áskerı teńizshilerdiń daıyndyǵy synalyp jatyr.
