Qazaqstan Kıprmen jan-jaqty áriptestikti damytýǵa múddeli – Prezıdent
ASTANA. KAZINFORM – Qazaqstan men Kıpr prezıdentteriniń kelissózderdi resmı delegatsııanyń qatysýymen keńeıtilgen quramda jalǵasyp jatyr. Memleket basshysy Qasym-Jomart Toqaev bul sapardyń Eýropalyq Odaq Keńesine Kıprdiń tóraǵalyǵy kezeńinde ótip jatqanyn erekshe baǵalady.
Óz sózinde Prezıdent Qazaqstan Respýblıkasy men Kıpr Respýblıkasy arasyndaǵy dıplomatııalyq qatynastar ornaǵannan beri Kıpr Prezıdentiniń elimizge alǵashqy resmı sapary ótip jatqanyn aıtty.
– Biz ekijaqty formatta óte nátıjeli pikir almasý ótkizdik. Yntymaqtastyǵymyzdy odan ári damytýǵa qatysty ortaq ustanymdarymyzdy atap óttik jáne aldaǵy ýaqytta áli tolyq paıdalanylmaǵan, zerttelýi qajet kóptegen múmkindikter bar ekenimen kelisemiz. Qazaqstanǵa kelsek, biz alǵa qaraı jyljýǵa jáne eki elge de tıimdi bolatyn kez kelgen kelisimder jasaýǵa daıynbyz. Óıtkeni biz sizdiń elińizben qalyptasqan dástúrli dostyq baılanystarymyzdy joǵary baǵalaımyz jáne bul biz úshin álbette óte mańyzdy, – dedi Q.Toqaev.
Prezıdent bul sapardyń Eýropalyq Odaq Keńesine Kıprdiń tóraǵalyǵy kezeńinde ótýi óte sımvoldyq mánge ıe ekenin aıtty.
– Biz Sizdiń tóraǵalyq kezeńdegi basshylyǵyńyzdy joǵary baǵalaımyz jáne osy mańyzdy mıssııanyń qorytyndy kezeńinde tabysqa jete berýińizge tilektespiz. Qurmetti Prezıdent myrza, Sizdiń basshylyǵyńyzben Kıprdiń halyqaralyq bedelin nyǵaıtýǵa eleýli úles qosyldy. Kıpr teńgerimdi, jaýapty jáne bolashaqqa baǵyttalǵan syrtqy saıasat júrgizýdi jalǵastyryp keledi, al Qazaqstan sizdiń elińizben jan-jaqty áriptestikti damytýǵa múddeli, – dedi Qazaqstan Prezıdenti.
Aıta keteıik, 2-4 maýsym kúnderi Memleket basshysy Qasym-Jomart Toqaevtyń shaqyrýymen Kıpr Respýblıkasynyń Prezıdenti Nıkos Hrıstodýlıdıstiń Qazaqstanǵa resmı sapary ótedi.
Táýelsizdik saraıynda Qasym-Jomart Toqaev Kıpr prezıdentin saltanatpen qarsy aldy. Kazinform agenttigi eki el arasyndaǵy qarym-qatynastyń negizgi baǵyttaryna sholý jasady.
