Qazaqstan kıikterin saqtaý tájirıbesi Nıý-Iorkte tanystyryldy

ASTANA. KAZINFORM – Nıý-Iorkte ótken halyqaralyq ǵylymı is-sharada Qazaqstannyń kıikterdi saqtaý jáne olardyń popýlıatsııasyn qalpyna keltirý tájirıbesi tanystyryldy.

kıik
Foto: QR Ekologııa jáne tabıǵı resýrstar mınıstrligi

12 qarashada Nıý-Iork qalasynda The Explorers Club halyqaralyq zertteýshiler uıymynyń Ortalyq Azııa bólimshesiniń (Central Asia Chapter) resmı ashylý rásimi ótti.

Іs-shara barysynda Qazaqstannyń bıoalýantúrlilikti saqtaý qaýymdastyǵynyń (ASBK) ókili Albert Salemgareev elimizdiń tabıǵı murasy, sonyń ishinde kıikterdi saqtaý jáne olardyń popýlıatsııasyn qalpyna keltirý baǵytynda atqarylǵan jumystar týraly baıandady.

Bir kezderi sany kúrt azaıyp, joıylyp ketý qaýpine tap bolǵan kıikterdiń popýlıatsııasyn qalpyna keltirý Qazaqstandaǵy tabıǵatty qorǵaý jumystarynyń mańyzdy nátıjeleriniń birine aınaldy.

– Bul nátıjege kópjyldyq qorǵaý sharalary, ǵylymı zertteýler, turaqty monıtorıng jáne tabıǵat qorǵaý uıymdarynyń birlesken jumysy yqpal etti. The Explorers Club uıymynyń Ortalyq Azııa bólimshesiniń ashylýy halyqaralyq ǵylymı yntymaqtastyqty keńeıtýge, birlesken ekspedıtsııalar uıymdastyrýǵa jáne óńirdiń tabıǵı murasyn zertteýge jańa múmkindikter beredi, – delingen is-shara týraly aqparatta.

Osylaısha, Qazaqstannyń jabaıy tabıǵatty qorǵaý salasyndaǵy tájirıbesi halyqaralyq ǵylymı qaýymdastyqqa usynylyp, kıikterdi saqtap qalý jáne olardyń sanyn qalpyna keltirý máseleleri halyqaralyq deńgeıde talqylandy.

Aıta keteıik, buǵan deıin Ulybrıtanııa hanzadasy Ýılıam BBC efırinde Qazaqstannyń kıik popýlıatsııasyn qalpyna keltirýdegi jetistigin joǵary baǵalaǵan edi. Ol kıikter sanynyń qaıta kóbeıýine Qazaqstandaǵy tabıǵatty qorǵaý sharalary yqpal etkenin atap ótti.