Qazaqstan kıikterdi jazda kóshirý úshin Reseımen kelissóz júrgizip jatyr

ASTANA. KAZINFORM – Ekologııa jáne tabıǵı resýrstar mınıstri Erlan Nysanbaev eldegi egin aýmaqtaryn kıikterden qorǵaý úshin qandaı sharalar júrgiziletinin aıtyp berdi.

– Kıik popýlıatsııasy 2003 jyly 21 myń ǵana bolsa, bıyl – 2 mln 833 myńǵa deıin ósti, al kóktemgi tólden keıingi sany shamamen 4 mıllıonǵa deıin kóbeıedi. Qazirgi tańda álemdik popýlıatsııasynyń 99 protsenti Qazaqstanda mekendeıdi, – dedi mınıstr Úkimet úıinde ótken baspasóz máslıhatynda.

Halyqaralyq tabıǵatty qorǵaý odaǵy Qyzyl kitapta kıiktiń tabıǵı qorǵaý mártebesin úsh sanatqa joǵary kóterip, «Joıylý qaýpi tónip turǵan» sanatynan «Qaýip tóný shegine jaqyn» sanatyna aýystyrdy. 

– Biz kıikti qorǵaý jumystaryn áli de jalǵastyramyz. Oǵan qosa, aýyl sharýashylyǵy jerleriniń qorǵalýyn kúsheıtý sharalaryn josparlap otyrmyz. Ol úshin qosymsha 112 jumys ornyn ashamyz. Aqbókenderdiń taralý aýmaǵy keńeıdi, al ınspektorlyq quram jetkiliksiz. Ásirese, bul jaǵdaı Batys Qazaqstan popýlıatsııasyna qatysty. Tarıhı turǵydan alǵanda, Batys Qazaqstan popýlıatsııasynyń eń kóp sany 298 myń bolatyn. Al qazir tóldeý kezeńinen keıin bul kórsetkish 2 mıllıonnan asty. Sondyqtan, biz bul máseleni aýyl sharýashylyǵy jerlerin qorǵaýdy kúsheıtý arqyly sheshýdemiz, - deıdi mınıstr. 

Sonymen qatar, Batys Qazaqstan popýlıatsııasy nemese Edil-Jaıyq popýlıatsııasy jaz aılarynda Reseı Federatsııasynyń aýmaǵyna kóship otyratyn. 

– Muny eki eldiń ǵalymdary da rastaıdy. Osyǵan baılanysty biz aqbókenderdiń jaz mezgilinde tarıhı mekenderine erkin ótýin qamtamasyz etý úshin kelissózder júrgizip jatyrmyz. Bul aýyl sharýashylyǵy ónimderin óndirýshilerge túsetin júktemeni de azaıtýǵa kómektesýi múmkin, – deıdi Ekologııa mınıstri. 

Aıta keteıik, alpystan astam qulan «Іle-Balqash», «Altyn Dala» rezervattaryna kóshirildi.

Sondaı-aq, aldaǵy bes jylda Eýropadan Qazaqstanǵa 40 Prjevalskıı jylqysy ákelinedi.

Budan bólek, Qazaqstannyń Qyzyl kitabyna taǵy 11 janýar túri engiziledi.