Qazaqstan kıeli oryndardy qorǵaýǵa árdaıym basa mán beredi – Máýlen Áshimbaev
ASTANA. KAZINFORM – Qazaqstan BUU-nyń Dinı nysandardy qorǵaý jónindegi is-qımyl josparyn qoldaıdy. Bul týraly elordada BUU-nyń qoldaýymen dinı nysandardy qorǵaý jónindegi arnaıy sessııa barysynda QR Parlamenti Senatynyń tóraǵasy Máýlen Áshimbaev aıtty.
Aıta keteıik, BUU Órkenıetter alıansy baǵytynda dinı nysandardy qorǵaý jóninde arnaıy sessııa Álemdik jáne dástúrli dinder kóshbasshylarynyń Sezi aıasynda uıymdastyrylyp otyr.
Senat tóraǵasy, Álemdik jáne dástúrli dinder kóshbasshylary sezi Hatshylyǵynyń basshysy Máýlen Áshimbaev arnaıy sessııaǵa qatysýshylarǵa iltıpat bildirip, Alıans búkil adamzat úshin halyqtar, mádenıetter jáne dinder arasyndaǵy dıalogty jolǵa qoıýda mańyzdy mıssııa atqaryp kele jatqanyn atap ótti. Sondaı-aq Uıym 20 jyl ishinde ekstremızmniń aldyn alýǵa, dinı kemsitýshilikke qarsy kúreske jáne beıbitshilik mádenıetin qalyptastyrýǵa aıtarlyqtaı úles qosqanyna basa mán berildi. Hatshylyq basshysy Dinı nysandardy qorǵaý jónindegi arnaıy sessııa byltyrǵy qarashada Portýgalııada ótken BUU Órkenıetter Alıansynyń 10-shy Jahandyq forýmynyń logıkalyq jalǵasy ekenin jáne bul bastama adamzatty alańdatqan ózekti máseleler men olardy eńserý joldaryn qamtyǵanyn da tilge tıek etti.
«Qazaqstan Respýblıkasynyń Prezıdenti Qasym-Jomart Kemeluly Toqaev atap ótkendeı, Qazaqstan halqy túrli órkenıetter men dinderdiń dástúrin, tózimdilik pen ashyqtyq qasıetterin qabyldady. Sondyqtan «birligimiz – áralýandyqta» qaǵıdaty elimizdiń negizgi ustanymyna aınaldy. Bizdiń jerimizde ǵasyrlar boıy ártúrli dinı ǵıbadathanalar men rýhanı nysandar beıbit jaǵdaıda qyzmet kórsetip kelgeni tarıhtan belgili. Bul qundylyqtar aldaǵy ýaqytta da mádenı muramyzdyń ajyramas bir bólshegi bolyp qala beredi. Batys pen Shyǵystyń túıisken tusynda ornalasqan Qazaqstan ejelden halyqtardy, mádenıetter men dinderdi baılanystyratyn geografııalyq jáne órkenıettik kópir rólin atqaryp keledi. Kıeli oryndardyń barlyǵy bizdiń halyqtarymyzdyń tarıhynda mańyzdy oryn alady. Onyń bári bizdiń baǵa jetpes rýhanı-mádenı muramyz. Sondyqtan olardy saqtaýǵa jáne qorǵaýǵa árdaıym basa mán beremiz», – dedi M. Áshimbaev.
Senat tóraǵasy óz sózinde Qazaqstan BUU Bas Assambleıasynyń 2023 jylǵy Konfessııaaralyq dıalog jáne óshpendilik tiline qarsy is-qımyl týraly qararyn, sondaı-aq, BUU-nyń Dinı nysandardy qorǵaý jónindegi is-qımyl josparyn qoldaıtynyn atap ótti.
Atap aıtqanda, búgin elordadaǵy ashyq dıalog aıasynda din kóshbasshylary men memleket qaıratkerleri kıeli nysandardyń jáne ǵıbadat oryndarynyń qaýipsizdigin qamtamasyz etetin kelisilgen tásilderdi jasaqtaý jóninde pikir almasty. Sessııaǵa qatysýshylar álemniń kóptegen aımaqtarynda ǵıbadat oryndary men qasıetti jerlerge qatysty qaýiptiń arta túskenine alańdap otyr. Búginde vandalızm, qasıetti nysandardy qorlaý jáne dinı tózimsizdik saldarynan týyndaǵan zorlyq-zombylyq áreketteriniń kóbeıgeni jasyryn emes. Mundaı ahýal halyqaralyq qaýymdastyqtyń jedel jáne úılesimdi jaýabyn talap etedi. Osyǵan baılanysty dinı uıymdar, memleketter jáne halyqaralyq qurylymdar arasyndaǵy jahandyq seriktestikti nyǵaıtýǵa, sondaı-aq, kıeli oryndardy qorǵaýdyń turaqty quqyqtyq jáne ınstıtýtsıonaldyq tetikterin ázirleýge qatysty biryńǵaı úndeý jasaldy.
Sessııaǵa qatysýshylar qasıetti nysandardy qorǵaý búkil álemdik qaýymdastyqtyń ortaq jaýapkershiligi ekenin de basa aıtty. Іs-sharada Sezd toleranttylyq pen ózara syılastyq ıdeıalaryn dáripteý úshin rýhanı jáne saıası kóshbasshylar kúsh biriktiretin biregeı alań ekeni de sóz boldy.
Budan buryn habarlanǵandaı, BUU Bas hatshysynyń orynbasary – BUU Órkenıetter Alıansynyń Joǵary ókili Mıgel Anhel Moratınos Qazaqstannyń jahandyq deńgeıde beıbitshilik pen turaqtylyqty qamtamasyz etý jolyndaǵy batyl qadamdaryn joǵary baǵalady. Arnaıy sessııada Mıgel Anhel Moratınostyń basshylyǵymen ázirlengen BUU-nyń Dinı nysandardy qorǵaý jónindegi is-qımyl jospary tanystyryldy.