Qazaqstan kıbersportshylary álem chempıonatynyń bas júldesin – $50 myń utyp aldy

ASTANA. QazAqparat – Qazaqstan quramasy kıbersporttan Balı aralynda (Indonezııa) ótken «PUBG MOBILE» chempıonatynda birinshi oryndy jeńip aldy, dep habarlaıdy QazAqparat tilshisi Qazaqstan kıbersport federatsııasyna silteme jasap.

Atalǵan básekede qazaqstandyq Damır Omarov, Baqytjan Elmenbet, Danııar Qonaqbaı men Arman Chamanı álem chempıony atandy.

«Qazaq Cybersport Federation» komandasy jasaqtaldy. Osy qurammen Azııalyq irikteý kezeńine qatysyp, ony jeńip aldyq. Nátıjesinde bizdiń komanda Balıdegi álem chempıonatyna qatysýǵa joldama aldy. Chempıonat 1-10 jeltoqsan aralyǵynda ótti. Oǵan álemniń 106 elinen jınalǵan kıbersportshylar qatysty. Bizdiń jeńiske jetkenimizdi búgin jarııalady. Bul – bizdiń mundaı aýqymdy týrnırdegi birinshi jeńisimiz. Naqty aıtsaq, bul – Qazaqstan quramasynyń «PUBG MOBILE»-degi alǵashqy jeńisi, -

dedi «Qazaq Cybersport» federatsııasynyń atqarýshy dırektory Qazbek Janǵazıev.

15 fınaldyq matchtyń qorytyndysy boıynsha Qazaqstan quramasy 193 upaımen týrnır reıtınginde kósh bastady. Osylaısha, elimizdiń kıbersportshylary 6 altyn medaldi qanjyǵalap, saıystyń bas júldesi – 50 myń dollardy utyp aldy.