Qazaqstan kıbersportshylardyń sany jóninen álemde 21-orynda
ASTANA. QazAqparat - Qazaqstanda kıbersport jańa deńgeıge shyqty. Sarapshylardyń málimetinshe, elimizde belsendi oıynshylardyń sany 1 mıllıonnan asyp jyǵylady, dep habarlaıdy QazAqparat «Habar 24» telearnasyna silteme jasap.
Degenmen, kásibı oıynshylardyń sany kóp emes - 50-ge jýyq. Biraq bul da ýaqyt enshisinde. Búginde Mádenıet jáne sport mınıstrliginde resmı tirkelgen jańa sport túrin damytýǵa barlyq jaǵdaılar jasalýda.
Qanysh Ábikenov onlaın-fýtbolmen kásibı túrde aınalysady. Geımer respýblıkalyq týrnırlerde jeńiske jetken, kıbersporttan Azııa oıyndaryna da qatysqan. Qanysh kompıýterlik oıyndarǵa Qytaıda oqyp júrgen kezde qyzyǵa bastaǵan. Ýaqyt óte kele hobbı mamandyqqa aınaldy. Qazir kıbersportshy Máskeýde ótetin iri halyqaralyq jarysqa daıyndyq ústinde.
«Búginde bul ındýstrııa jaqsy damyǵan. Qazaqstan atynan shyqqan týrnırlerde bar kúsh-jigerimizdi salýǵa tyrystyq: jeńý kerek, nátıje kórsetý qajet. Aldaǵy jaqyn ýaqytta Indonezııa men Malaızııa ózara uıymdastyratyn azııalyq týrnırler bar. Men shaqyrý aldym. Áli sheshim qabyldamadym. Múmkin naýryzdyń sońy-sáýirdiń basynda baryp qalamyn», - deıdi ol.
Jalpy Qazaqstanda kıbersportqa bir mıllıonnan astam adam qyzyǵýshylyq bildirip otyr. Sarapshylardyń boljaýynsha, ótken jyly kıbersport aýdıtorııasy 380 mln adamdy qurady. Al kelesi jyly 500 mln-nan asýy yqtımal.
«Eger Dota 2 dıstsıplınasy týraly aıtar bolsaq, onda júlde qory 20 mln dollardan asty. Kıbersportty áleýmettik lıft retinde pozıtsııalaýǵa bolady. Naýryz aıynda Qytaıda kompıýterlik sporttan halyqaralyq jarys ótedi. Bizdiń Ulttyq qurama irikteý kezeńinen ótti. Bul, olardyń kásibı deńgeılerin kórsetedi. Sondaı-aq qazirgi ýaqytta komandamyz CS:GO boıynsha jaqsy oıyn mánerin kórsetýde. Soǵan qarap, qazaqstandyq kıbersportshylardyń keleshegi zor ekendigin aıtýǵa bolady», - deıdi Qazaqstan Kıbersport federatsııasy jobalarynyń úılestirýshisi Ǵalym Balqanaev.
Onyń aıtýynsha, kıbersportshylardy qoldaý úshin qurylǵan federatsııada «geımerlik», ıaǵnı ýaqytty maqsatsyz ótkizý uǵymynan arylý boıynsha jumystar júrgizilýde.
Eske salaıyq, jaýyrda ǵana Astanada bir apta boıy oqýshy bala izdestirildi. Keıin ol kompıýterlik klýbtan tabyldy.
Federatsııa qazaqstandyqtardy durys oınaýǵa - rejımdi jáne baǵdarlamany saqtaı otyryp úıretýge kúsh salmaq. Al kásibı sportshylarmen bapkerler men psıhologtar jumys isteıtin bolady.
Mundaı ustanymdy elordalyq psıhoterapevt Anar Qarajanova da qoldaıdy.
Mamannyń aıtýynsha, kompıýterlik oıyndar paıdaly da kórinedi. Olar beıimdelýge jáne jyldam áreket etýge úıretedi. Bastysy, shekti bilý jáne shynaıy ómirdi oıynmen almastyrmaý.
«Eger kez kelgen azamat búkil sharýasyn jıyp tastap, bar oıy men ýaqytyn vırtýaldy álemdegi jarysqa arnasa, bul aýrýdyń belgisi. Osynyń kesirinen túrli jaǵdaılar oryn alady. Al eger ózińdi oıynǵa emes, kerisinshe, úırenýge, damýǵa baǵyttasań, kásibı sportshy retinde qalyptasýǵa múmkindik zor. Kez kelgen istiń ólshemi bolýy tıis», - deıdi psıhoterapevt.
Málim bolǵandaı, Qazaqstan kıbersportpen aınalysatyn oıynshylar sany jóninen álemde 21-orynda tur. Olardyń arasynda 14-34 jastaǵy er adamdar basym.
