Qazaqstan kıberpolıtsııasy 2025 jyly shetelde 7 call-ortalyqty joıdy
ASTANA.KAZINFORM - Kıberqylmysqa qarsy kúres – Іshki ister mınıstrliginiń basym baǵyttarynyń biri. Azamattardy tsıfrlyq keńistikte qorǵaý boıynsha polıtsııa birqatar jumys atqaryp keledi, - dep jazdy Polisia.kz.
- Bizdiń departament memlekettik organdarmen birlesip, osy qylmystyń aldyn alý boıynsha biraz jumys atqaryp jatyr. Burynǵy «dástúrli» qylmystar ınternet damyǵan zamanda onlaın-keńistikke aýysyp, olardyń jańa túrleri shyǵyp jatyr. Burynǵy urlyqtardyń bári onlaınǵa kóship, qylmyskerler jańa aıla paıdalanyp, azamattardyń aqshasyn urlaý úshin ınternettiń damyǵan tehnıkalaryn qoldanyp jatyr. Mundaı qylmyspen kúresýdi úsh baǵytta júrgizý qajet. Ol zańnamalyq sharalar, ekinshi - tehnıkalyq sharalar, úshinshi - profılaktıkalyq sharalar. Osy sharalardy birlesip atqarǵan kezde ǵana kıberqylmysty toqtatýǵa bolady, - dedi ІІM kıberqylmysqa qarsy is-qımyl departamentiniń bastyǵy Jandos Súıinbaı.
2025 jyly baılanys operatorlarymen birlesip, 19 mıllıonnan astam jalǵan qońyraý buǵattaldy. Jalpy júıe iske qosylǵan sátten bastap mundaı 85 mıllıonnan astam qońyraýǵa tosqaýyl qoıylǵan. Qylmystyq top qurý jáne basqarý faktileri boıynsha 6 qylmystyq is qozǵaldy, onyń biri transulttyq sıpatta.
- Qazirgi ýaqytta qabyldanǵan tehnıkalyq sharalardyń nátıjesinde 100 myńnan astam sim-karta tárkilendi. Qylmyskerlerden 88 sim-box alyndy. Azamattardyń quqyqtyq, kompıýterlik jáne qarjylyq saýattylyǵyn kóterý basty nazarda. Halyqqa qylmystardyń jańa túrleri jáne olardan qorǵaný ádisteri týraly aıtyp jatyrmyz, - dedi spıker.
Ótken jyly tártip saqshylary shetelde 7 call-ortalyqqa tosqaýyl qoıdy. Odan bólek, Qazaqstan aýmaǵynda 6 call-ortalyq joıyldy. Alaıaqtyqtyń túri jeterlik. Olardyń arbaýyna túsip qalmaý úshin polıtsııa qarapaıym erejelerdi ustanýdy usynady.
- Kıbergıgıena ustanǵan adam mundaı qylmysqa urynbaıdy. Jalǵan siltemelerge ótpeý kerek. Bank kartalaryn úshinshi tulǵalarǵa bermeý kerek. Jeke derekterdi eshkimge aıtpaý qajet, - dedi Jandos Súıinbaı.
Aıta keteıik, Qazaqstan Birikken Ulttar Uıymynyń kıberqylmysqa qarsy kúreske baǵyttalǵan konventsııasyn ratıfıkatsııalamaq. Bul týraly Ashyq NQA portalynda jarııalanǵan qujat jobasynda aıtylǵan.