«Qazaqstan-QHR» baǵytyndaǵy poıyz jolaýshylary betperde kııýge mindetteldi
QR Indýstrııa jáne ınfraqurylymdyq damý mınıstrliginiń aqparatyna súıensek, búgingi tańda Qazaqstan men Qytaı arasynda aptasyna bir ret úsh jolaýshylar poıyzy qatynaıdy.
Atap ótilgendeı, QHR-dan poıyzben keletin jolaýshylar men jolserikter teplovızormen dene qyzýyn ólsheý jolymen turaqty negizde tekseriledi.
«2020 jylǵy 6 qańtardan sanıtarlyq-epıdemıologııalyq organdardyń qyzmetkerleri jolaýshylarda, poıyz brıgadalary men mashınısterde betperdeniń bolýyn qatań talap etedi», - dedi mınıstrlikten.
Buǵan deıin habarlaǵanymyzdaı, búgingi tańda Qytaıǵa áýe tasymaldaryn Qazaqstan tarapynan «Air Astana» jáne «SCAT» avıakompanııalary, Qytaı tarapynan «Air China» jáne «China Southern Airlines «áýe kompanııalary oryndaıdy. Barlyǵy aptasyna 34 reıs jasalady, onyń ishinde 22 reısti otandyq, 12 reısti qytaılyq kompanııalar júzege asyrady.
«Air Astana» avıakompanııasy Qytaıdan Qazaqstanǵa týrıstik toptardyń saparlaryn oryndaýdan bas tartty.
Eske salaıyq, búgin QR Prezıdenti Qasym-Jomart Toqaev Qytaıdan Qazaqstan aýmaǵyna koronavırýstyń taralýyna jol bermeý boıynsha naqty uıymdastyrý sharalaryn qabyldaýdy tapsyrdy.
Keıin QR Premer-Mınıstri Asqar Mamın Qazaqstan aýmaǵynda koronavırýstyń taraýyna jol bermeý jáne onyń aldyn alý sharalary jóninde keńes ótkizdi.
Qazir Qytaıda pnevmonııalyq ınfektsııanyń jańa túri tarap jatyr. Syrqatqa shaldyqqan jáne kóz jumǵandar sany kún sanap artyp keledi. Alǵashqy naýqastar tirkelgen kúnderi (15 qańtar) esepke 41 adam alynǵan bolatyn.
Sońǵy málimetter boıynsha, Qytaıda jańa koronavırýsty juqtyrǵandar 1326-ǵa jetip, ólimmen 41 oqıǵa aıaqtaldy.
Pnevmonııanyń bul túri Taıland, Eýropa elderi men AQSh-ta tirkelip otyr.
Qazaqstan koronavırýsty zerthanalyq jaǵdaıda anyqtaýǵa múmkindik beretin praımerlerdi satyp alýdy bastady.
QR Densaýlyq saqtaý mınıstrligi elimizde ınfektsııa tirkelmegenin resmı málim etti.
QR Syrtqy ister mınıstrliginiń aqparatynsha, karantınge jabylǵan Qytaıdyń Ýhan qalasynda búginde Qazaqstannan 230 stýdent oqıdy. Olardyń 98-i ǵana qalada qalyp otyr. Qalǵandary demalystyń bastalýyna baılanysty Qazaqstanǵa jáne basqa da elderge ketip qalǵan.
Elimiz óńirlerindegi barlyq áýejaılarda profılaktıkalyq sharalar jáne oqý-jattyǵý jumystary júrgizilýde.
