Qazaqstan keıbir jasandy ıntellekt júıelerine zańmen tyıym salmaqshy

ASTANA. KAZINFORM – Májiliste Jasandy ıntellekt týraly zań birinshi oqylymda talqylanyp jatyr.

Qujatty tanystyrǵan depýtat Ekaterına Smyshlıaeva zań jobasy jasandy ıntellekt júıeleri men túrleriniń jumysyna qandaı jaǵdaıda tyıym salatynyn aıtty.

- Zań jobasynda qaýipsizdik máselelerine erekshe nazar aýdarylady. Endi jasandy ıntellekt júıeleri táýekel deńgeıine qaraı, eń tómengiden bastap eń joǵaryǵa deıin jikteledi. Joǵary táýekel júıeleri asa mańyzdy aqparattyq-kommýnıkatsııalyq ınfraqurylym obektisine jatqyzylatyn bolady.

Sonymen qatar, zań jobasy jasandy ıntellekt júıelerin kómekshilerge, jartylaı avtonomdy júıelerge jáne tolyq avtonomdy algorıtmderge bóledi. Sonyń nátıjesinde Qazaqstan Respýblıkasynyń aýmaǵynda keıbir júıelerdi qoldanýǵa tyıym salynady, - dedi ol.

Qujat jasandy ıntellektini paıdalanýdyń myna túrlerine de tyıym salýdy kózdeıdi:

- Adamdardyń sanaly kelisiminsiz minez-qulqyna áser etetin jasandy ıntellektini qoldanýǵa;

- Adamdardyń osaldyǵyn (jasy, múgedektigi, áleýmettik jaǵdaıy) ádeıi paıdalanatyn jasandy ıntellektini paıdalanýǵa;

- Adamdardy áleýmettik minez-qulqy nemese sıpattamalary boıynsha baǵalaýǵa nemese jikteýge (áleýmettik skorıng);

- Adamdardyń emotsııalaryn olardyń kelisiminsiz taldaý úshin jasandy ıntellektini paıdalanýǵa;

- Zańmen ruqsat etilgen jaǵdaılardan basqa kezde naqty ýaqyt rejıminde qoǵamdyq oryndarda bet-álpetti taný úshin jasandy ıntellektini qoldanýǵa;

- Zańnamada tyıym salynǵan jasandy ıntellekt qyzmetiniń nátıjelerin jasaýǵa jáne taratýǵa tyıym salynady.

Buǵan deıin Qazaqstanda qaı salaǵa jasandy ıntellekt belsendi engizilip jatqanyn jazǵan edik.