Prezıdent: Qazaqstan Kenııamen GovTech jáne FinTech tájirıbesimen bólisýge daıyn
ASTANA. KAZINFORM — Memleket basshysy «Qazaqstan-Kenııa» bıznes forýmy barysynda jasandy ıntellekt jáne tsıfrlandyrý salasyndaǵy yntymaqtastyqtyń mańyzyna nazar aýdardy, dep habarlaıdy Aqordanyń baspasóz qyzmeti.
Onyń aıtýynsha, Kenııa Afrıkanyń «Kremnıı savannasy» retinde keńinen tanymal.
— Qazaqstan GovTech jáne FinTech salalarynda mol tájirıbe jınady. Bul rette elektrondyq úkimetke jáne zamanaýı bank ınfraqurylymyna qatysty úzdik sheshimderimen bólisýge daıyn. Sonymen qatar jasandy ıntellekt jáne ǵaryshty ıgerý salasynda yntymaqtastyq ornatqymyz keledi. Búgin qol qoıylǵan IT, ǵarysh tehnologııasy salalaryndaǵy birqatar memorandým elderimizdiń nátıjeli ári uzaqmerzimdi seriktestigine jol ashatyny anyq, — dedi Qazaqstan Prezıdenti.
Qasym-Jomart Toqaev «Astana» halyqaralyq qarjy ortalyǵy (AHQO) men Naırobı halyqaralyq qarjy ortalyǵy arasyndaǵy áriptestikti quptady.
Memleket basshysy kenııalyq kompanııalardy AHQO múmkindikterin belsendi paıdalanyp, Ortalyq Azııada jáne odan tysqary jerlerde bıznesin kórkeıtýge shaqyrdy.
Prezıdenttiń pikirinshe, búginde Qazaqstannyń týrızm salasy qarqyndy damyp keledi, osy oraıda «shytyrman oqıǵaǵa toly» týrızmdi damytqan jón.
Memleket basshysy búgingi forým Qazaqstan men Kenııa arasyndaǵy yntymaqtastyq áleýetin kórsetkenin atap ótti. Sondaı-aq ekonomıkalyq baılanystardy nyǵaıtýǵa qos taraptyń da nıetti ekenin jetkizdi.
Osydan buryn Qasym-Jomart Toqaev pen Ýılıam Rýto «Qazaqstan-Kenııa» bıznes forýmyna qatysqanyn jazǵanbyz.
Toqaev kenııalyq ınvestorlardy Qazaqstanmen seriktestikke shaqyrdy.
