Qazaqstan Kenııamen yqpaldastyǵyn bekemdeı túsýge nıetti — Toqaev
ASTANA. KAZINFORM — Qazaqstan Kenııamen yqpaldastyǵyn bekemdeı túsýge nıetti. Bul týraly elimizge memlekettik saparmen kelgen Kenııa Respýblıkasynyń Prezıdenti Ýılıam Rýtomen kelissózderden keıin BAQ ókilderine málimdeme jasaǵan Memleket basshysy Qasym-Jomart Toqaev aıtty.
— Bul — Kenııa basshysynyń elimizge jasaǵan alǵashqy sapary. Osy tarıhı sapar qos memlekettiń yntymaqtastyǵyn jańa beleske kóteredi dep senemiz. Kenııa — Qazaqstannyń Afrıka qurlyǵyndaǵy eń iri jáne senimdi saýda seriktesiniń biri. Biz eki eldiń yqpaldastyǵyn odan ary bekemdeı túsýge nıettimiz. Kenııa Respýblıkasy sońǵy jyldary damýdyń dańǵyl jolyn shyqty, — dedi Prezıdent.
Memleket basshysynyń aıtýynsha, Shyǵys Afrıkanyń jaýhary sanalatyn bul el qarjy, aýyl sharýashylyǵy, kólik-logıstıka jáne basqa salalarda eleýli jetistikke qol jetkizdi. Naırobı qalasy mańyzy halyqaralyq dıplomatııa ortalyǵy sanalady. Munda BUU-nyń birneshe qurylymy tıimdi jumys istep tur.
— Jalpy, alǵanda, Kenııanyń álemdik sahnadaǵy bedeli artyp keledi. Bul Prezıdent Rýtonyń sarabdal saıasaty men kóregen kóshbasshylyǵynyń nátıjesi dep bilemiz. Biz byltyr Naırobıde óz Elshiligimizdi ashtyq. Bul sheshim Qazaqstannyń Kenııaǵa shynaıy yqylasy men dostyǵyn ańǵartady. Jalpy, bul — Qazaqstannyń Afrıka qurlyǵyndaǵy altynshy dıpomatııalyq ókildigi, — dedi Qasym-Jomart Toqaev.
Buǵan deıin Memleket basshysy Qasym-Jomart Toqaevtyń elimizge memlekettik saparmen kelgen Kenııa Respýblıkasynyń Prezıdenti Ýılıam Rýtony Táýelsizdik saraıynda resmı qarsy alý rásimi ótken edi.
