Qazaqstan Kenııadaǵy Mombasa portyn paıdalanýǵa múddeli — Prezıdent
ASTANA. KAZINFORM — Qazaqstan bıdaıdy jáne ózge de taýarlardy Afrıka naryǵyna jetkizýge múddeli. Bul týraly elimizge memlekettik saparmen kelgen Kenııa Respýblıkasynyń Prezıdenti Ýılıam Rýtomen kelissózderden keıin BAQ ókilderine málimdeme jasaǵan Memleket basshysy Qasym-Jomart Toqaev aıtty.
— Jalpy, elimiz Afrıka memleketterimen baılanysyn bekemdeýge basa mán beredi. Búgin Prezıdent Ýılıam Rýto myrzamen birqatar mańyzdy másele boıynsha mazmundy kelissóz júrgizdik. Ásirese, saýda-ekonomıkalyq yqpaldastyqty keńeıtýge nazar aýdardyq. Kólik, aýyl sharýashylyǵy, aqparattyq tehnologııalar, týrızm, ónerkásip jáne basqa da salada birlesken jobalardy iske asyrýǵa ýaǵdalastyq. Elderimiz arasynda turaqty túrde áýe reısterin ashý múmkindigi týraly da pikir almastyq, — dedi Prezıdent.
Memleket basshysy Qazaqstan aýyl sharýashylyǵy ónimderin, eń aldymen bıdaıdy jáne ózge de taýarlardy Afrıka naryǵyna jetkizýge múddeli ekenin basa aıtty.
— Osy maqsatpen Mombasa portyn paıdalaný máselesin qarastyrdyq. Bul — osy aımaqtyń 8 memleketine jol ashatyn Shyǵys Afrıkadaǵy eń iri logıstık ortalyǵynyń biri. Búginde Qazaqstan naryǵynda Kenııanyń birqatar taýary, sonyń ishinde shaı jáne kofe ónimderi bar. Muny eki el arasynda ornyqqan turaqty saýda qatynasynyń kórinisi deýge bolady, — dedi Qasym-Jomart Toqaev.
Buǵan deıin Memleket basshysy Qasym-Jomart Toqaevtyń elimizge memlekettik saparmen kelgen Kenııa Respýblıkasynyń Prezıdenti Ýılıam Rýtony Táýelsizdik saraıynda resmı qarsy alý rásimi ótken edi.
