Qazaqstan Keńes Odaǵy tusynda qabyldanǵan Konventsııany qaıta qarastyrady
ASTANA. QazAqparat -Búgin Senattyń Áleýmettik-mádenı damý jáne ǵylym komıtetiniń keńeıtilgen otyrysynda «Bilim berý salasyndaǵy kemsitýshilikke qarsy kúres týraly konventsııany ratıfıkatsııalaý týraly» zań jobasy talqylandy. Qujat palatanyń aldaǵy ýaqytta ótetin jalpy otyrysyna shyǵarylatyn bolady.
Bilim jáne ǵylym mınıstri Tahır Balyqbaevtyń aıtýynsha, atalǵan Konventsııa BUU Bilim, ǵylym jáne mádenıet jónindegi Bas konferentsııasynyń 1960 jylǵy 14 jeltoqsanda Parıj qalasynda jasalǵan. Konventsııanyń maqsaty adam quqyqtarynyń jappaı saqtalýyn jáne barlyǵynyń bilim alýǵa teń qoljetimdiligin qamtamasyz etý úshin ulttar arasyndaǵy yntymaqtastyqty ornatý, sonymen birge, bilim berý salasyndaǵy kez kelgen kemsitýshilikti joıý bolyp tabylady. Jalpyǵa birdeı múmkindikter teńdigi men osy saladaǵy barlyǵyna birdeı qarym-qatynasty kótermeleý qarastyrylady.
«Aıta keterligi, Konventsııany Keńester Odaǵy 1962 jyly ratıfıkatsııalaǵan bolatyn. Keıin Odaq taraǵannan soń egemen elderdiń barlyǵy Konventsııaǵa ózdiginen táýelsiz memleket retinde qosylyp jatyr. Qazaqstan da osyǵan qosylýy úshin konventsııany usynyp otyrmyz», - dedi vıtse-mınıstr. Onyń aıtýynsha, Qazaqstannyń Konstıtýtsııasy men barlyq zańnamasy Konventsııa erejelerine sáıkes keledi.
Aıta keteıik, Konventsııadaǵy «kemsitýshilik» sózi násili, túr-túsi, jynysy, tili, dini, saıası nemese ózge de nanymdary, ulttyq nemese áleýmettik tegi, ekonomıkalyq jaǵdaıy nemese týý belgileri boıynsha kez kelgen aıyrmashylyqty, joqqa shyǵarýdy, shekteýdi nemese artyqshylyq berýdi qamtıdy.
Onyń maqsaty nemese saldary bilim berý salasyndaǵy qarym-qatynas teńdigin joıý buzý bolyp tabylady.
Konventsııaǵa qatysýshy memleketter bilim berý salasyndaǵy múmkindikter men qarym-qatynastar teńdigin júzee asyrý úshin ulttyq jaǵdaılar men salt-dástúrlerge sáıkes keletin ádisterdi paıdalanatyn jalpy memelkettik saıasatty ázirleýge, damytýǵa septigin tıgizedi. Bul rette bastaýy bilim berýdi mindetti jáne tegin etýge, orta bilimdi onyń túrli nysandaryn jalpyǵa birdeı ıgilik etýge jáne onyń jalpyǵa birdeı qoljetimdiligin qamtamasyz etýge jaǵdaı jasaıdy.
Memleket bastaýysh bilimin almaǵan nemese ony aıaqtamaǵan adamdardy jáne árkimniń qabiletterine sáıkes olardyń bilim alýdy jalǵastyratyn bilim berýdiń laıyqty ádisterimen kótermeleýge jáne damytýǵa mindetti bolady. Oqytýshy kásibine daıarlyqty kemsitýshiliksiz qamtamasyz etýge jaǵdaılar jasaıdy.
Tutastaı alǵanda konventsııaǵa Qazaqstannyń qatysýy bilim berý salasyndaǵy halyqaralyq qaýymdastyqpen yqpaldastyqtyń mańyzdylyǵyn kórsetip, elimizdiń osy saladaǵy halyqaralyq normalardy saqtaýdy jáne ustanatynyn dáleldeıdi.
