Qazaqstan ken oryndarynan munaı alý ónimdiligin arttyrmaq

ASTANA. QazAqparat - QR Energetıka mınıstrligi iri kompanııalarmen birlese qazaqstandyq ken oryndarynda munaıdy alý ónimdiligin arttyrý ádisterin zertteýdi josparlap otyr.

Aıta keteıik, búgin Astanada mınıstrlik, «QazMunaıGaz», «QazTransGaz» jáne «Shell Qazaqstan» kompanııalary arasynda yntymaqtastyq týraly memorandýmǵa qol qoıyldy.

«Ózderińiz bilesizder, Qazaqstanda munaıdy óndirý koeffıtsenti tıisti deńgeıde emes. Ókinishke qaraı, postkeńestik keńistikte munaı óndiretin elder arasynda sońǵy oryndardamyz. Osy rette bul máselemen biz óte belsendi túrde aınalysamyz»,-dedi QR Energetıka mınıstri Qanat Bozymbaev qujatqa qol qoıǵannan keıin.

Sonymen qatar taraptar ózge eki baǵytty zertteýge ýaǵdalasty. Onyń ishinde Qarashyǵanaq ken orny shıkizatymen gazhımııalyq keshenniń qurylysyn júrgizý múmkindigi men jańaratyn energııa kózderin damytýdaǵy yntymaqtastyq qamtylǵan.