Qazaqstan kemelerindegi mamandardyń 40 paıyzy sheteldikter

ASTANA. KAZINFORM – Qazaqstanyń teńiz flotynda júrgen kásibı mamandardyń 40 paıyzy sheteldikter. Kólik mınıstrligi Temirjol jáne sý kóligi komıteti tóraǵasynyń orynbasary Qasym Tilepov Ortalyq kommýnıkatsııalar qyzmetinde  osyndaı derek keltirdi.

«Saladaǵy kadrlyq áleýetke keletin bolsaq, otandyq teńiz flotynyń júzý quramynda 1,5 myńǵa jýyq teńizshi bar. Onyń 900-i Qazaqstan azamattary, 600-i sheteldikter. Jalpy teńiz kóligi kadrlaryna qajettilik shamamen 200 adamǵa teń. Teńiz kóligi mamandaryn eki joǵary oqý orny daıarlaıdy – Qazaqstan-Brıtan tehnıkalyq ýnıversıteti janyndaǵy Qazaqstan teńiz akademııasy jáne Sh.Esenov atyndaǵy Kaspıı tehnologııa jáne ınjınırıng ýnıversıteti», - dedi ol.

Komıtettiń anyqtama málimeti boıynsha, 2020 jyly teńiz mamandyqtarynyń oqý aqysy 636 myń teńgeden 1 mln teńgege deıin qymbattatylǵan. Qazaqstan-Brıtan tehnıkalyq ýnıversıteti endi ony 2,5 mln teńgege deıin kóterýdi surap otyr. Komıtet Ǵylym jáne joǵary bilim mınıstrligine osy usynysty qoldap hat joldap otyr.