Qazaqstan kemeleri Hanty-Mansıısk okrýgine deıin shyǵýǵa múmkindik alady

NUR-SULTAN. QazAqparat - Qazaqstan kemeleri Ob ózenimen Hanty-Mansıısk okrýgine deıin shyǵýǵa múmkindik alady. Bul týraly QR Indýstrııa jáne ınfraqurylymdyq damý vıtse-mınıstri Berik Kamalıev aıtty, dep habarlaıdy QazAqparat tilshisi.

Senattyń jalpy otyrysynda «Keme qatynasy týraly kelisimdi ratıfıkatsııalaý týraly» QR Zańy boıynsha baıandama jasaǵan onyń aıtýynsha, atalǵan qujatta ekijaqty tasymaldardy habarlama tártibine aýystyrý belgilengen. Jyl saıyn, 1 sáýirge deıin ýákiletti organdar ekijaqty tasymaldardy júzege asyratyn kemelerdiń aldyn ala tizimderin kelisetin bolady. Qajet bolǵan jaǵdaıda jyl ishinde bul tizimge ózgeris engizý múmkindigi qaralǵan.

«Bul rette kelisim qabyldanǵannan keıin qazaqstandyq tasymaldaýshylar ózen tasymaldaryn Ertis basseıni sheginde ǵana emes, Ob ózenimen Hanty-Mansıısk okrýgine deıin shyǵýǵa múmkindik alady. Sondaı-aq Atyraý, Astrahan, Volgograd porttary arasyndaǵy ekijaqty tasymaldardy jańartý máselesi de qarastyrylǵan. 2025 jylǵa qaraı ózen tasymaldarynyń kólemin «Nurly jol» baǵdarlamasy boıynsha 3,8 mln tonnaǵa deıin jetkizýdi josparlap otyrmyz», - dedi Berik Kamalıev.

Vıtse-mınıstr kelisim taraptardyń porttar qyzmetterine teń jaǵdaılar jasaýyn, sondaı-aq keme jáne ekıpaj músheleriniń qujattaryn ózara tanýdy kózdeıtindigin aıtty.

«Bul baqylaýshy organdardyń kemelerdi qarap-tekserý rásimderin jeńildetýge múmkindik beredi. Kelisimdi iske asyrý aıasynda taraptar ekıpaj quramyna qoıylatyn talaptardy belgileý boıynsha jeke vedomstvoaralyq shart qabyldaýdy josparlaýda», - dedi ol.