Qazaqstan kelisimniń, beıbitshiliktiń jáne toleranttyqtyń tiregi - Dýdar Jakenov
ALMATY. 1 shilde. QazAqparat /Názıra Eleýhan/ - Qazirgi zamanda búkil dúnıejúzinde toleranttyqtyń bolmaýynyń saldarynan sıpaty boıynsha ártúrli, biraq maǵynasy bir áleýmettik qaıshylyqtardy kóp baıqaımyz. Bul týraly búgin Almatyda Ortalyq Azııadaǵy toleranttylyq máselelerine arnalǵan Azamattyq forým barysynda QR Syrtqy ister mınıstrliginiń keńesshisi Dýdar Jakenov aıtty.
Onyń aıtýynsha, bundaı jaǵdaıda Qazaqstan túrli qoǵamdyq toptardyń ózara túsinistigin sıpattaıtyn qarym-qatynastyń úlgisin kórsetýde. "Bul Qazaqstandaǵy toleranttyq dástúrdiń tarıhı sabaqtastyǵy ǵana emes, bizdiń memleketimizdiń birinshi Prezıdenttiniń maqsatty da ıkemdi saıasatynyń jetistigi, ol ótpeli kezeńniń kúrdeli áleýmettik-ekonomıkalyq jáne kúrdeli saıası jaǵdaıynda separatızm men ultaralyq jáne konfessııalyq alaýyzdyqtar týraly oılaýǵa da múmkindik bermesten adamı qarym-qatynastyń "názik salasyn" saqtap qalýǵa kúsh saldy. Burynǵy keńestik elderdegi túrli etnostar men túrli dinı toptar sol elderge kóptegen aýyrtpalyqtar ákelse, Qazaqstanda olar bizdiń Prezıdentimizdiń saıasatyn jetistikter men zor tabystarǵa jetkizdi",-dedi Dýdar Jakenov.
Onyń pikirinshe, Qazaqstan kelisimniń, beıbitshiliktiń jáne toleranttyqtyń tiregi jáne árqashanda solaı bola beredi.
Dýdar Jakenov sonymen qatar, forýmde: "El basshysy búkil álemdik qaýymdastyqqa túrli etnostar men dinı konfessııa ókilderiniń arasynda ózara qarym-qatynasty ádepti túrde basqarýdyń biregeı úlgilerin pash etti. Sondyqtan, qazirgi Qazaqstandy "halyqtar dostyǵynyń zerthanasy" dep ataýǵa bolady",-dep atap ótti.
