Qazaqstan keler jyly munaı óndirisin azaıta ma
ASTANA. KAZINFORM – «Qazmunaıgaz» kompanııasynyń basqarma tóraǵasy Ashat Hasenov BAQ ókilderimen ótken baspasóz máslıhatynda keler jyldyń munaı óndirý jospary munaı baǵasyna baılanysty qubylýy múmkin ekenin aıtty.
«Dál qazir óndiris kólemi artyp otyr. Jyldyń josparymyz 19,5 mln tonna bolǵan. 10 aıdyń qorytyndysy boıynsha 19,9 mln tonna óndirdik. Sonda munaı óndirý kólemi boıynsha jospardan 400 myń tonnaǵy artyq jyljyp baramyz. Jospar 19,5 mln tonna bolsa, fakt 19,9 mln tonna. Kelesi jyly keminde bıylǵy jospardyń kórsetkishin ustap turamyz. Onyń bári munaı baǵasyna baılanysty ekenin bilesiz ǵoı. Biraq bizdiń mindet – árıne, óndiris kólemin azaıtpaý», - dedi Ashat Hasenov jýrnalıstiń suraǵyna bergen jaýabynda.
«Qazmunaıgaz» basshysynyń aıtýynsha, Qazaqstan 2024 jyldyń toǵyz aıynda 18 mln tonna munaı óndirgen. Bul byltyrǵy kórsetkishten 3% artyq.
«Munaı tasymaldaý kólemi byltyrǵy kórsetkishpen salystyrǵanda 6-ǵa joǵary bolyp, shamamen 63 mln tonnaǵa jetti. Munaı óńdeý josparǵa saı tolyq kólemde oryndaldy. KPI zaýyty 2024 jyldyń toǵyz aıy ishinde 166 myń tonna polıpropılen shyǵardy, bul ótken jylmen salystyrǵanda 84%-ǵa kóp. Zaýytta barlyq kepildik synaq jumystaryn aıaqtady, aldymyzdaǵy maqsat — jobalyq qýatyna shyǵý», - dedi ol.
