Qazaqstan kedenshileri jolaýshylar deklaratsııasyn toltyrýǵa mindetteldi

ASTANA. QazAqparat - Qazaqstannyń jańa Kedendik kodeksinde keden qyzmetkerlerine jolaýshylardyń deklaratsııasyn toltyrý mindeti júkteldi, dep habarlaıdy QazAqparat tilshisi.

«Jańa kedendik kodekste kedendik organnyń sizdiń suraýyńyz boıynsha deklaratsııańyzdy toltyrýǵa mindetti ekeni jazylǵan. Deklaratsııany kez kelgen adam toltyra almaıdy, máselen, siz ózge elge ushyp keldińiz, deklaratsııalaıtyn júgińiz bar. Ol úshin broker izdep, aqsha shyǵyndaısyz. Endi, 1 qańtardan bastap, kez kelgen kedenshige deklaratsııany toltyryp berý ótinish bildire alasyz jáne onda qol qoıý ǵana jetkilikti», - dedi QR Qarjy mınıstrligi Memlekettik kirister komıteti tóraǵasynyń orynbasary Ǵusman Ámrın.

Ol jańa memlekettik qyzmet túriniń mindetti emes ekenin jáne adamdardyń óz qalaýymen broker jaldaı alatynyn basa aıtty. Sondaı-aq, Ǵ.Ámrın mundaı múmkindikti memlekettiń eksporttaýshylarǵa da qoljetimdi etkisi keletinin atap ótti.