Qazaqstan kedenshileri qaıyrymdylyq qyzmetti syltaýratyp taýarlardy kontrabandalyq jolmen tasymaldaǵandardyń jolyn kesti

ASTANA. 29 tamyz. QazAqparat - Qoǵamdyq qorlardy ruqsat alyp tekserý nátıjesinde keden organdarynyń qyzmetkerleri qaıyrymdylyq qyzmetin syltaýratyp taýarlardy kontrabandalyq jolmen tasyǵan qylmystyq topty anyqtady, dep habarlady QR Qarjy Mınıstrliginiń Kedendik baqylaý komıtetiniń baspasóz-qyzmetinen.

Qoǵamdyq qorlardy tekserýge túrtki bolǵan jaǵdaı, Qazaqstan múgedekteriniń «Igi jumys» qaıyrymdylyq qory tarapyna baǵyttalǵan Qytaı Halyq Respýblıkasynan kelgen jalpy sommasy 52,6 mln. teńgeni quraıtyn kontrabandalyq taýardyń «Kaljat» keden beketinde anyqtalýy boldy. Tólenbegen tólemder men salyqtyń sommasy 12,3 mln. teńgeden asyp jyǵyldy. Osy oqıǵa boıynsha qylmystyq is qozǵalyp, tekserý júrgizilýde.

Qoǵamdyq qorlardy odan ári tekserý barysynda keden qyzmetkerlerimen tómendegideı jaıttardyń beti ashyldy: QHR keletin taýarlar qaıyrymdylyq sharasyna degen syltaýmen kedendik salym men salyqtardan bosatylyp otyrǵan. Biraq kelgen taýarlar aıtylǵan maqsatqa jumsalmaı, respýblıkamyzdyń saýda oryndaryna túsip otyrǵan.

Osyndaı tásilder «Blago-Vest», «Erchınaz topjarǵan», «Dástúr» qoǵamdyq qorlarynda paıdalanylǵan. Joǵaryda atalǵan qorlardan memleketke kelgen shyǵyn 247 mln. teńgeni qurady. Osy faktiler boıynsha tekserýler júrgizilýde, olardyń nátıjeleri boıynsha qylmystyq is qozǵalatyn bolady.

Sonymen birge, «Olja», «Aıala», «Іgi jumys», «Mıloserdnye lıýdı» sııaqty qoǵamdyq qorlardyń jalǵan adamdarǵa tirkelgendigi anyqtaldy. Osy ádister kontrabandalyq taýarlardy asa úlken kólemde kirgizýge múmkindik bergen. Osylaısha, 2013 jyldyń aqpan aıynan bastap mamyr aıyna deıin atalǵan qorlarmen 746 mln. teńgeniń taýarlary zańsyz kirgizilgen, al tólenýge tıisti salyqtar 543 mln. teńgeni qurap otyr. Osy fakti boıynsha qylmystyq is qozǵalyp, tergeý júrip jatyr.