Qazaqstan Keden odaǵy aıasynda 1 mlrd. dollar shamasynda agroónimdi eksporttady

ASTANA. QazAqparat - Kedendik keńistik aıasynda Qazaqstan shamamen 1 mlrd. dollar quraıtyn agroónerkásiptik kesheniniń ónimin eksporttady. Bul týraly búgin Aýyl sharýashylyǵy mınıstrliginiń janyndaǵy Іskerlik keńestiń kezekti otyrysy barysynda málim boldy.

Mamandardyń aıtýynsha, ıntegratsııa Qazaqstannyń aýyl sharashylyǵy taýaryn óndirýshilerge jaǵymdy áser etken. Máselen, byltyrǵy jyldyń ózinde 2012 jylmen salystyrǵanda Qazaqstannyń Keden odaǵy elderine eksporty 208 paıyzǵa artyp otyr.

«Bul rette eksport kórsetkishi aýyl sharýashylyǵy taýarlaryn óńdeý boıynsha da artyp otyrǵanyn aıtýymyz kerek. Naqtylasaq, 2013 jyly 2012 jylmen salystyrǵanda aýyl sharýashylyǵynyń óńdelgen taýarlarynyń eksporty 60 paıyzǵa ósken», - deıdi Aýyl sharýashylyǵy mınıstri Asyljan Mamytbekov.

Onyń aıtýynsha, Kedendik odaq aıasynda qazaqstandyq taýar óndirýshileri básekelestikte shyńdalyp qana qoımaı, ózderiniń múmkindikterin syrtqy hám ishki naryqqa da keńeıtip otyr.

Toqtala ketetin jaıt, Іskerlik keńes músheleri Keden odaǵy arqasynda qazaqstandyq aýyl sharýashylyǵy taýaryn óndirýshiler úshin 170 mln. halqy bar, shamamen jalpy ishki ónim somasy 1,8 trln. dollaryn quraıtyn naryq ashylǵanyn atap ótedi.