Qazaqstan keden qyzmeti «Qaljat» kedeninde ustalǵan júkter boıynsha qyrǵyz kásipkerlerine qatysty shaǵymnyń joq ekenin aıtady
ALMATY. Naýryzdyń 30-y. QazAqparat /Ádilet Musahaev/ - Qazaqstan keden qyzmeti qyrǵyz kásipkerlerine qatysty shaǵymnyń joq ekendigin jáne QR zańnamasyna sáıkes «Qaljat» kedendik beketinde ustalǵan júkter boıynsha sheshim qabyldaıtynyn málim etti.
Bul jaıynda búgin arnaıy ótken baspasóz máslıhatynda aıtyldy, dep habarlaıdy QazAqparat.
Almaty oblysy boıynsha KBD «Qaljat» keden beketinde aǵymdaǵy jyldyń aqpan aıynyń 8-de jedel-izdestirý sharalar keshenin júrgizýdiń nátıjesinde QHR-nan Qyrǵyzstanǵa taýar tasymaldaýshy «Trans Standart» JShS, «Azııa Trakt» JShS, «M-nefte-Servıs» JShS kompanııalaryna tıesili 54 kóliktik quraldar ustalǵan.
Kedendik tekseris júrgizý jónindegi sheshim taýardyń naqty jaǵdaıynyń «tranzıt taýarlar» rejıminde júk kedendik deklaratsııa retinde paıdalanylyp, jetkizýdi baqylaý qujatyndaǵy tasymaldaýshylar kórsetken málimettermen qanshalyqty sáıkes keletinin tekserý maqsatynda qabyldanǵan. QHR kedenimen áriptestik jónindegi kelisimge sáıkes, Departament joǵaryda kórsetilgen avtokólikterge QHR-da eksportty kedendik rásimdeý kezinde usynylǵan kedendik deklaratsııalardy jáne taýarǵa ilespe qujattardy berý ótinishimen Úrimshi kedenine suraý salǵan bolatyn. Nátıjesinde halyq tutynatyn taýarlar júgi tıelgen 21 avtokólik quraly Almaty qalasyna jóneltilýi kerektigi jáne atalǵan júkti qabyldap alýshylar QR azamattary ekendigi anyqtalǵan.
Sondaı-aq, avtokólik quraldarynyń júk bóligin tekserý barysynda tasymaldanǵan taýarlardyń ataýy, sany, salmaǵy jáne quny tasymaldaýshylar usynǵan taýarǵa joldama qujattaryndaǵy málimetterimen sáıkes kelmeıtindigi belgili boldy.
Qylmystyq zańnamaǵa sáıkes, atalǵan quqyq buzý qylmystyq áreket dep tanylyp, jalǵan qujattardy paıdalana otyryp iri kólemdegi ekonomıkalyq kontrabanda retinde baǵalanady.
Qazirgi ýaqytta tekseris qorytyndylary boıynsha «Trans Standart» JShS, «Azııa Trakt» JShS, «M-nefte-Servıs» JShS-larynyń laýazymdy tulǵalaryna qatysty QR QK 209 babynyń 1-bóligi boıynsha 5 qylmystyq is qozǵalyp otyr.
