Qazaqstan qazir qant dıabetine shaldyqqan 5-15 jas aralyǵyndaǵy balalardy ınsýlın sorǵysymen qamtamasyz etip otyrǵan álemdegi jalǵyz memleket bolyp otyr
ALMATY. 12 qarasha. QazAqparat - Qant sýsamyrymen aýyratyndardyń sany qazir álemde 371 mıllıon adamdy quraýda. Bul búgin Almatyda qant sýsamymyryna shaldyqqan adamdardy ınsýlın sorǵysymen emdeıtin Qazaqstandaǵy alǵashqy ortalyqtyń ashylýy týraly baspasóz máslıhatynda aıtyldy.
«Qazaqstandaǵy qant sýsamyrymen aýyratyn 227 myń adamnyń 1800-in balalar qurap otyr. Medtronic kompanııasy biregeı qural-jabdyqtaryn ákelip, qant sýsamyrynyń birinshi túrine shaldyqqan 5 jastan 15 jasqa deıingi aralyqtaǵy balalarǵa az mólsherdegi ınsýlındi teri astyna úzdiksiz egý júıesin engizdi. Ol balalardyń ómir súrý sapasyn jaqsartýǵa múmkindik berýde», - deıdi Qazaqstan Dıabetıkalyq qaýymdastyǵynyń prezıdenti Leıla Jubandyqova. Onyń aıtýynsha, 5-ten 15 jasqa deıingi Qazaqstannyń barlyq balalary ınsýlın sorǵysymen tegin qamtamasyz etilýde. Bul - elimizdiń úlken jetistigi. Qazaqstan qazir álemde qant dıabetine shaldyqqan barlyq balalardy ınsýlın sorǵysymen qamtamasyz etip otyrǵan jalǵyz memleket bolyp otyr. Insýlın sorǵysyn qabyldaǵandar ony qabyldamaıtyn basqa balalardan eń aldymen psıhologııalyq kedergini joıýymen erekshelenedi. Sondaı-aq olar aýrýdyń asqynýynan qorǵalǵan.
