Qazaqstan Qajylyq Mıssııasy Mekke qalasynda oryn alǵan qaıǵyly oqıǵa arasynda qazaqstandyqtar joq ekenin málimdeıdi
ASTANA. QazAqparat - Qazaqstan Qajylyq Mıssııasy Saýd Arabııa Koroldiginiń Mekke qalasyna oryn alǵan qaıǵyly oqıǵa arasynda qazaqstandyqtar joq ekenin málimdeıdi. Bul týraly QMDB baspasóz qyzmeti habarlady.
«Qazir Qazaqstan qajylaryna qyzmet etip jatqan kompanııa jetekshilerinen shuǵyl málimet alyndy. Aldyn ala málimetter boıynsha, zardap shekkender arasynda jerlesterimiz joq ekenin málimdeımiz. Sol sátte bizdiń qajylar Jamarat kópirine ózge jolmen júrgen. Osyǵan oraı, otandastarymyzdy alańdamaýǵa shaqyramyz. Búgin QMDB tóraǵasy, Bas múftı Erjan qajy Malǵajyulynyń shuǵyl tapsyrmasyna oraı, qajylar arasynda túsindirý, qaýipsizdik sharalaryn saqtaý jumystary kúsheıtildi», - dep málimdedi Qazaqstan Qajylyq Mıssııasynyń tóraǵasy Ǵylymbek Májıev.
Keshe keshke Mıssııa músheleri Mına jazyǵynda birqatar fırma basshylarymen, Qazaqstan qajylarymen kezdesý ótti. Kompanııa jetekshilerine qazaqstandyq qajylar úshin qaýipsizdik sharalaryn kúsheıtý týraly tapsyrma berildi. «Buǵan qajylyq fırmalarynyń 100 qyzmetkeri, Qazaqstan musylmandary dinı basqarmasynyń 70 ókili jumyldyryldy», - dep atap ótti Ǵ.Májıev.
Qajylardyń kúndelikti densaýlyǵy Mıssııamen birge barǵan qazaqstandyq dárigerlerdiń jiti nazarynda. 2015 jyldyń 11 qyrkúıeginen bastap qajylyqqa attanǵan jerlesterimizdiń arasynda 24 qyrkúıekke deıin qatty naýqastanǵan adam tirkelmedi.
Keshe 78 jastaǵy M.Mansurova esimdi qarııa júrek aýrýynan jergilikti emhanalardyń birinde em júrgizý barysynda kóz jumdy. 1937 jyly týylǵan áje egde jastaǵy densaýlyǵy men jaǵdaıyna qaramastan jalǵyz kelgen.
Qazaqstan Qajylyq Mıssııasy budan bylaı egde jastaǵy qarııalardy jaqyn týystarynsyz qajylyqqa jibermeý týraly talap qoıady.
