Qazaqstan qazaq kúresinen álem chempıonatynyń alǵashqy kúninde úsh altyn medal jeńip aldy
ASTANA. KAZINFORM — Qazaqstan quramasy Bakýde ótip jatqan eresekter arasyndaǵy qazaq kúresinen álem chempıonatynyń alǵashqy kúninde úsh altyn, bir kúmis jáne bir qola medal jeńip aldy, dep habarlaıdy Ázerbaıjandaǵy Kazinform agenttiginiń menshikti tilshisi.
Álem chempıonaty 22-23 tamyzda Baku Sports Hall sport kesheninde ótip jatyr. Jarysqa túrli elderden kelgen sportshylar qatysyp, erler men áıelder arasyndaǵy 16 salmaq dárejesinde júldeler sarapqa salynady.
Jarystyń alǵashqy kúnindegi basty oqıǵa qazaqstandyq balýandardyń jeńisi boldy.
55 kelige deıingi salmaqta Rýzımon Týgýshev fınalda Tájikstan ókili Moborız Borotzodany jeńip, álem chempıony atandy.
60 kelige deıingi salmaqta Ernur Súleıman da altyn júldege qol jetkizdi. Ol sheshýshi beldesýde grýzııalyq sportshy Djıordjı Inashvılıden basym tústi.
Qazaqstan qorjynyna úshinshi altyndy 74 kelige deıingi salmaqta Jumajan Qojambekov saldy. Fınalda qazaqstandyq balýan Tájikstan ókili Mýhamadradjab Hýseınzodadan myqty boldy.
Osylaısha, jarystyń alǵashqy kúniniń qorytyndysy boıynsha Qazaqstan quramasynyń enshisinde úsh altyn medal bar.
Taǵy eki júldeni qazaqstandyq sportshylar áıelder arasyndaǵy salmaq dárejelerinde ıelendi. 60 kelige deıingi salmaqta Ardaq Nursaq kúmis medal, al 48 kelige deıingi salmaqta Janat Qazez qola júlde jeńip aldy.
Bakýdegi sátti bastama qazaqstandyq balýandardyń halyqaralyq arenadaǵy nátıjeli óneriniń jalǵasy boldy. Qurama sapynda iri jarystarda tájirıbe jınaǵan sportshylar bar. Atap aıtqanda, Týgýshev — 2024 jylǵy álem kýbogynyń jeńimpazy. Súleıman — 2023 jylǵy Azııa chempıony jáne 2025 jylǵy CISM álem chempıony. Al Qojambekov 2022 jáne 2025 jyldary álem chempıony atanǵan.
Álem chempıonatynda Qazaqstan barlyq 16 salmaq dárejesinde, onyń ishinde erler arasyndaǵy segiz jáne áıelder arasyndaǵy segiz salmaqta tolyq qurammen óner kórsetip jatyr.
Jarystyń ashylý saltanatynda sportshylardy quttyqtaǵan Qazaqstannyń Ázerbaıjandaǵy elshisi Álim Baıel qazaq kúresiniń ulttyq muranyń bir bóligi ekenin atap ótti. Onyń aıtýynsha, qazaq kúresi batyldyqtyń, kúsh pen qadir-qasıettiń sımvoly sanalady. Elshi sportshylarǵa ádil beldesý men jeńis tiledi. Sondaı-aq halyqaralyq jarystar halyqtar arasyndaǵy dostyqty nyǵaıtýǵa yqpal etetinin aıtty.
Qazir qazaq kúresi Qazaqstannan tys jerlerde de belsendi damyp keledi. Ulttyq kúres túri álemniń 40-tan astam elinde tanymal. Bakýde álem chempıonatynyń ótýi qazaq kúresine degen halyqaralyq qyzyǵýshylyqtyń artyp kele jatqanyn kórsetedi.
Jarys 23 tamyzda jalǵasady. Ekinshi kúni qalǵan segiz júlde jıyntyǵy sarapqa salynady.
Buǵan deıin Fatıma Supyǵalıeva Qazaqstannyń áıelder dzıýdosy tarıhyndaǵy tuńǵysh álem chempıony atanǵany habarlanǵan edi.
Qazaqstan tarıhynda dzıýdodan qyzdar arasynda alǵash ret osyndaı ataqqa qol jetkizgen sportshymen Kazinform tilshisi suhbattasqan edi.
