Qazaqstan qaıtarylǵan aktıvterdi satýdan qansha tabys tapty

ASTANA. KAZINFORM – Qazaqstandaǵy aktıvter memlekettik múlik tizilimi portaly arqyly satylady. Al, shetelde ornalasqan aktıvterdi satý sol eldiń zańnamasyna sáıkes iske asyrylady. Bul týraly Qarjy mınıstrliginiń Kazinform saýalyna joldaǵan jaýabynda aıtylǵan.

«Búgingi tańda «Qaıtarylǵan aktıvterdi basqarý kompanııasy» JShS óz qyzmetinde kelesi nátıjelerge qol jetkizdi. 2024 jylǵy 17 qazandaǵy jaǵdaı boıynsha Qorǵa 6,5 mlrd teńge aýdaryldy. Osy somanyń 6,3 mlrd teńgesi aktıvterdi satýdan, al 255 mln teńgesi aktıvterdi basqarýdan (jalǵa berý) túsken», - dep jazylǵan jaýapta.

Mınıstrlik mamandarynyń aıtýynsha, aktıvterdi satýdan jáne basqarýdan túsetin túsimderdiń kólemin boljaý qıyn. Óıtkeni, satý protsesi kóptegen faktorǵa baılanysty jáne satylymnyń merzimderi men somalary naryqtyq jaǵdaıǵa jáne kelisimder sharttaryna qaraı ózgerýi múmkin.

«Basqarýshy kompanııanyń balansyna qabyldanatyn aktıvterdiń jalpy quny - 90,4 mlrd teńge, onyń 87,5 mlrd teńgesi (97%) balansta, al 2,9 mlrd teńgesi (3%) qabyldaý protsesinde. Qazaqstandaǵy aktıvter www.e-qazyna.kz memlekettik múlik tizilimi portalynda satylady. Shetelde ornalasqan aktıvter sol eldiń zańnamasyna sáıkes satylyp, iske asyrylady», - delingen mınıstrlik málimetinde.

Buǵan deıin Úkimettiń baspasóz qyzmeti Túrkistan jáne Aqmola oblystarynda memleketke qaıtarylǵan qarajat esebinen áleýmettik nysandar salynatynyn málim etken bolatyn.