«Qazaqstan - qaı jaǵynan alǵanda da TMD elderiniń kósh bastaýshysy» - respýblıkalyq basylymdarǵa sholý
***
«Keshe Prezıdenttik mádenıet ortalyǵynyń kontsert zalynda brıtanııalyq saıasatker, jazýshy, Djonatan Aıtkenniń «Nazarbaev jáne Qazaqstannyń qaryshty qadamy» atty kitabynyń tusaýkeseri bolyp ótti», dep jazady «Egemen Qazaqstan» gazeti búgingi nómirindegi «Elimizdi jurt Elbasy arqyly tanydy» degen maqalasynda. Basylymnyń atap ótýinshe, atalǵan kitap buǵan deıin Anglııada, AQSh-ta, Túrkııada jáne Reseıde tanystyrylǵan. Onda Elbasynyń búkil ómir joly óte jaqsy kórsetilip, qaıratkerlik jarqyn kelbeti de nanymdy sýrettelgen. Sondaı-aq reformatorlyq keskini de, qazaq memleketin damytýdaǵy eren eńbegi je jan-jaqty ashyp kórsetilgen.
«Egemen Qazaqstan» gazetiniń jazýynsha, keshe Astanada «Qazaqstan-2020» demokratııalyq kúshter jalpyulttyq koalıtsııasynyń alǵashqy jıyny ótken. Jıynǵa qatysýshylar taǵy bir márte Elbasymen birge strategııalyq mindetterdi júzege asyrýǵa birikken koalıtsııanyń negizgi maqsatyna degen ózderiniń berik ustanymdaryn kórsetti. Olardyń aldynda sóz alǵan, partııa Tóraǵasynyń birinshi orynbasary Nurlan Nyǵmatýlın: «Az ǵana ýaqyttyń ishinde bizdiń demokratııalyq kúshter koalıtsııasyna birikken saıası partııalar men qoǵamdyq uıymdardyń sany 600-den asty. Osynyń ózi Elbasymyzdyń ókilettigin uzartý úshin referendým ótkizý bastamasynyń búkil halqymyzdy biriktirip, qazaqstandyqtardyń tek qana Nursultan Ábishuly Nazarbaevty qoldaýynyń taǵy bir naqty kórsetkishi deýge bolady», - dedi.
***
«Atyraýda musylmandar zıratynda belgisiz bireýler birneshe mazarlar men marqumdarǵa qoıylǵan qulpytastardy asa aıýandyq áreketpen talqandap ketken bolatyn. Adamı qasıetten jurdaı bolǵandardyń áreketteri marqumdardyń ǵana emes, jalpy halyqty dúrliktirdi. Qazirgi kúni halyq «osy eki musylman zıratyndaǵy adam shoshyrlyq áreketter ózge de zırattarda oryn ala ma?» degen qaýipten aryla almaı otyr», - dep jazady «Aıqyn» gazeti juma kúngi nómirindegi «Zıratty qıratqan kúdiktiler ustaldy» degen maqalasynda. Basylymnyń atap ótýinshe, qaladaǵy ortalyq musylmandar zıraty men qalanyń Azııa bóligindegi «Jólegen» atalyp ketken musylmandar zıratyna týystaryn jerlegen adamdar beıit basyna barǵan kezde ózderi ótken jyly ǵana jerlep, olarǵa turǵyzǵan máńgilik mekenniń tas-talqany shyǵyp, qırap jatqanyn kórip shoshyǵan. Dinnen bizgender eki zırattaǵy 31 mazardy talqandaǵan. Qazirgi ýaqytta musylmandar beıitin qıratqandar degen kúdikpen «Hımposelok» eldi mekeniniń 19-20 jastaǵy 7 turǵyny QR QІJK-niń 132 babyna sáıkes kúdikti retinde ustalyp, ýaqytsha ustaý ornyna qamaldy. Kúdiktilerdi ustaý kezinde olardan zilbalǵalar men ózge de aýyr salmaqty temir quraldar jáne dinı kitaptar tárkilenip alyndy. Bul dinı kitaptardyń qandaı aǵymdy ustanatynyn anyqtaý úshin zertteýge jiberildi. Kúdiktilerdiń biri - joǵary oqý ornynyń 2-kýrs stýdenti.
Osy basylymnyń dástúrli «Aq sóıle!» aıdarynyń búgingi qonaǵy - ekonomıka ǵylymdarynyń doktory, UǴA akademıgi, ál-Farabı atyndaǵy Qazaq ulttyq ýnıversıtetiniń professory Saǵyndyq Satybaldın. Basylymnyń barlyq saýaldaryna tuşymdy jaýap bergen ol: «Men jeke tulǵa retinde referendýmdy qoldap, qol qoıǵan bes mıllıonnan artyq otandastarymnyń birimin. Al ǵalym retinde aıtar bolsam, onda jeke basymnyń pikirin emes, ǵylymı toptyń oıyn, múddesin bildirgen bolyp shyǵamyn. Ózińiz bilesiz, men ál-Farabı atyndaǵy Qazaq ulttyq ýnıversıtetiniń professorymyn. Osyndaǵy ózim etene aralasyp júrgen tanymal ǵalymdar toby men stýdentter túgeldeı Nursultan Ábishulynyń prezıdenttik qyzmetin jalǵastyrýyn qalaıdy. Bulardyń syrtynda da men aralasatyn ǵalymdar, basqa da shyǵarmashylyq sala ókilderi jeterlik. Bir sózben aıtqanda, bilimdi, zııaly dep atalatyn qalyń qaýym da Nazarbaevtyń prezıdenttik qyzmeti jalǵasýyn ulttyq qajettilik dep biledi. Iá, bul - ulttyq qajettilik», - deıdi. Suhbattyń tolyq nusqasyn oqyǵyńyz kelse, «Qazaqstan - qaı jaǵynan alǵanda da TMD elderiniń kósh bastaýshysy» degen maqalaǵa nazar salyńyz.
***
«Dúkenderdi qansha aralasaq ta, Aq Azıadanyń nyshandary beınelengen ulttyq buıymdar taba almadyq. Ózińiz oılap qarańyzshy, VII qysqy Azııa oıyndarynyń emblemasy bar dombyralar, kishkentaı kıiz úıler, qolyna dombyra nemese qamshy ustaǵan Irbı barysy satylymǵa túsip jatsa, kermet emes pe?! Týrıster de osyndaı ulttyq nyshany sezilip turatyn zattarǵa qyzyǵatynyn nege túsinbeımiz? Ózimizdiń ulttyq qundylyqtarymyzdy osyndaıda kórsetip qalýǵa nege tyryspaımyz», - dep jazady «Alash aınasy» gazeti. Basylym kóterip otyrǵan másele tóńireginde egjeı-tegjeıli bilgińiz kelse, «Sheneýnikter ulttyq nyshandarymyzdy noqtalap otyr» degen maqalǵa kóz júgirtińiz.
«Alash aınasy» gazetiniń «Dat!» aıdarynda fılosofııa ǵylymynyń doktory, professor Naǵıma Baıtenovamen aradaǵy suhbat «Mektepte - pánder tarıhy, al dintaný joǵary oqý oryndarynda mindetti pán retinde qalyptasýy qajet» degen taqyryppen berilgen. Basylym tilshisiniń barlyq saýaldaryna jan-jaqty ári salmaqty jaýap bergen ǵalym: «16 mln. halyq arasynda 4000-nan asa dinı aǵymnyń bolýy bizdiń eldegi dinı ahýaldyń qandaı ekeninen habar beredi. Endeshe, osy taqyrypty zertteıtin ınstıtýttar da meılinshe kóp bolǵany durys. Qazirgi zertteý ortalyqtary jalpy din týraly túsinik berýden ári aspaı jatyr. Árbir dinniń basyn bir shalmaı, ár dinge, tipti árbir aǵymdy taldaıtyn zertteý oryndary qajet», -deıdi.
***
«Kazahstanskaıa pravda» gazetiniń jazýynsha, Memleket basshysynyń atyna Ońtústik Qazaqstan oblysynyń Shardara qalasynyń turǵyny Qurbanbaı Izturǵanovtan da hat keldi. Hat avtory Elbasynyń prezıdenttik ókilettigin 2020 jylǵa deıin uzartý jónindegi bastamashy toptyń usynysyn qoldaıtynyn jazady. Ol óz hatynda Prezıdenttiń memleketimizdi nyǵaıtýdaǵy, Qazaqstandy dúnıe júzine tanytýdaǵy orasan eńbegin jáne júrgizip kele jatqan kóregen saıasatynyń arqasynda Táýelsizdik jyldarynda qol jetkizgen jetistikterdi atap kórsetedi. Sondaı-aq Qazaqstan halqynyń mártebesin bıiktetip, egemen eldiń bedelin asqaqtatyp júrgen Tuńǵysh Prezıdent - Elbasy N.Á.Nazarbaevtyń basshylyǵymen atqarylǵan ıgi isterdi jyr joldaryna arqaý etken.
