Qazaqstan qaı elderge balyq eksporttaıdy
NUR-SULTAN. QazAqparat – Qazaqstan jyl saıyn 36 elge shamamen 60 mln AQSh dollary somasyna 30 myń tonna balyq ónimderin eksporttaıdy. Bul týraly Ekologııa, geologııa jáne tabıǵı resýrstar mınıstri Maǵzum Myrzaǵalıev málim etti, dep habarlaıdy QazAqparat tilshisi.
«Elimizdiń balyq jáne balyq ónimderi naryǵynyń jalpy kólemi 2019 jyly shamamen 66 myń tonnany qurady. Onyń qurylymy kelesideı: balyq aýlaý – 45 myń tonna, balyq ósirý – 7,5 myń tonnaǵa jýyq, eksport – 30 myń tonna, sondaı-aq ımport - 43,5 myń tonna», - dedi mınıstr Úkimet otyrysynda.
Onyń sózine qaraǵanda, Qazaqstan muhıt balyqtary men teńiz ónimderin ımporttaıdy. Olar: maıshabaq, skýmbrııa, krevetkalar, mıdııa jáne taǵy basqalary.
«Import Norvegııa, Reseı, Islandııa, Qytaı jáne Baltyq elderine tıesili. Bul rette, ımportty almastyrý maqsatynda Qazaqstanda albyrt, bekire balyqtaryn ósirip, Kaspıı teńizinde maıshabaq tárizdi balyqtardy aýlaý qajet. Óz kezeginde, Qazaqstan jyl saıyn jaqyn jáne alys sheteldiń 36 eline shamamen 60 mln AQSh dollary somasyna 30 myń tonna balyq ónimderin eksporttaıdy. Sonymen qatar, bizdiń qasymyzda eksport úshin aıtarlyqtaı áleýetti naryqtar bar. Atap aıtqanda, Reseı men Qytaıda balyq ónimderine suranys joǵary deńgeıde. Bul eki eldegi bizben shekaralas aýdandarynyń naryǵy úsh (3) mln tonnaǵa deıin jetedi. Nátıjesinde, bizdiń eksporttyq áleýetti 300 myń tonnaǵa deıin ulǵaıtýǵa múmkindik paıda bolady», - dedi Myrzaǵalıev.
