Qazaqstan qaı elderge astyq eksportyn arttyrdy
ASTANA. KAZINFORM – Astyq eksporty da edáýir ulǵaıdy. Bul týraly Úkimet otyrysynda QR Aýyl sharýashylyǵy vıtse-mınıstri Azat Sultanov málim etti.
- Óndiris pen qaıta óńdeý kóleminiń ósýi eksportty kezeń-kezeńimen ulǵaıtýǵa múmkindik berýde. 2025 jyldyń qorytyndysy boıynsha agroónerkásiptik keshen ónimderiniń eksporty 37%-ǵa ósip, 7 mlrd AQSh dollaryna jetti. Onyń jartysynan astamyn qaıta óńdelgen ónim quraıdy. Oń dınamıka osy jyly da saqtalýda, bul rette AÓK ónimderiniń syrtqy saýdasy alǵash ret shamamen 500 mln AQSh dollary kóleminde oń saýda saldosyn qalyptastyrdy, - dedi A. Sultanov.
Onyń aıtýynsha, fıtosanıtarııalyq qyzmet jumysynyń mańyzdy nátıjeleriniń biri – Qytaıǵa jemdik un eksportyn keńeıtý boldy. Qoıylatyn talaptar men ónimdi ótkizý tetiginiń kelisilýi tórtinshi jáne besinshi synyptaǵy astyqty qaıta óńdeýge ári oǵan turaqty eksporttyq suranys qalyptastyrýǵa múmkindik berdi. Nátıjesinde jemdik un eksporty 2,4 esege artyp, shamamen 3 mln tonnaǵa jetti.
- Astyq eksporty da edáýir ulǵaıdy. 2024/2025 marketıngtik jyly astyq pen unnyń astyq balamasyndaǵy eksporty rekordtyq 15,3 mln tonnaǵa jetti. Sonymen qatar «Qazaqstan temir joly» AQ málimetinshe, 2025 jylǵy qyrkúıekten 2026 jylǵy 30 shildege deıin Qazaqstan 13,9 mln tonna astyq pen astyq balamasyndaǵy un eksporttady. Bul ótken jyldyń sáıkes kezeńimen salystyrǵanda 12,6%-ǵa kóp. Ótken jyly osy kezeńde shetelge 12,4 mln tonna ónim jóneltilgen bolatyn. Eksportty yntalandyrý sharalarynyń arqasynda qazaqstandyq ónim Marokko, Aljır, Birikken Arab Ámirlikteri, Vetnam jáne birqatar Eýropa elderiniń naryqtaryna shyqty, sondaı-aq Ázerbaıjanǵa, Grýzııaǵa jáne Túrkııaǵa jetkizilimder qaıta jandandy, - dedi vıtse-mınıstr.
Buǵan deıin azyq-túlik boıynsha elde negizgi otandyq ónimder qanshalyqty qamtamasyz etilgenin jazǵan edik.
