Qazaqstan qaı elderden týrısterdi tartýǵa ekpin qoıyp otyr
ASTANA. KAZINFORM – Shetelde Qazaqstannyń týrıstik áleýetin tanystyrýǵa basa nazar aýdarylyp otyr. Bul týraly «Jibek Joly» telearnasynyń «Ýáde» baǵdarlamasyna suhbat bergen «Kazakh Tourism» UK» AQ Basqarma tóraǵasynyń mindetin atqarýshy Danıel Serjanuly aıtty.
– Halyqaralyq marketıngti kúsheıtý arqyly Kazakh Tourism-niń jumysyna basqasha qaraý boıynsha tapsyrma berildi. Osy saladaǵy týrızmniń tartymdylyǵyn kúsheıtý úshin jarnamany kóbeıtý kerek. Eń aldymen, «maqsatty týrıst» degen uǵymǵa ekpin qoıdyq. Máselen, biz elge shaqyratyn týrıster bar, ıaǵnı 10 mln sheteldik kelse, onyń ishinde týrıst retinde qomaqty paıda ákeletinderi bólek. Sondyqtan uıymdastyrylǵan týrızmge barlyq marketıngti beıimdedik. Qytaıdyń iri qalalaryna tikeleı áýe reısteri ashylyp jatyr. Osy oraıda sol naryqtarǵa baryp, sol jaqtan keletin adamdardyń sanyn kóbeıtýge jumys istedik, - dedi D. Serjanuly.
Bul turǵyda ol naqty bir naryqtarǵa arnalǵan jáne týrıstik ónimderge baǵyttalǵan marketıngke kóbirek kóńil bólingenin aıtty.
– Jalpy, týrızmniń marketıngi qıyn emes. Ony iske asyrý úshin áýe kompanııalarymen, týrıstik uıymdarmen seriktestik ornata bastadyq. Mysaly, Gýanchjoýdan Air Astana jańa reıs ashyp jatqanyn estisek, áýe kompanııasymen sol jerge baryp, kelissózder júrgizemiz. Qytaıdaǵy týrıstik operatordyń ókilderin Qazaqstanǵa alyp kelip, úlken tanystyrylym jasaımyz... Eń basty maqsat – shetelge Qazaqstannyń týrıstik áleýetin tanystyrý. Bar kúsh-jigerdi osy baǵytqa burdyq. Óıtkeni, Qytaı, Úndistan, Ońtústik Koreıa, Malaızııa, Japonııa, Arab elderi men Eýropa memleketterimen jeke-jeke jumys isteýimiz kerek, - dedi Danıel Serjanuly.
Eske salsaq, byltyr maýsym aıynda Prezıdent Qasym-Jomart Toqaevtyń tóraǵalyǵymen týrızmdi damytý jónindegi keńes ótti.
Memleket basshysy elimizdiń geografııalyq turǵydan ońtaıly ornalasqanyna, alýan túrli tabıǵatymyz, baı ári biregeı tarıhı-mádenı muramyz bar ekenine qaramastan, týrızm salasyndaǵy áleýettiń tolyq paıdalanylmaı otyrǵanyn synǵa aldy.