Qazaqstan qaı elderde saýda ókildigin ashady
NUR-SULTAN. QazAqparat – Qazaqstan bıyldan bastap 10 elde saýda ókildigin ashýdy josparlap otyr. Bul jaıynda Májilis depýtattarynyń resmı saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.
Úkimet basshysynyń atap ótýinshe, halyqaralyq tájirıbe kórsetip otyrǵandaı, syrtqy naryqtarda saýda ókildikterin ashý eń aldymen sheteldegi Qazaqstannyń ekonomıkalyq múddelerin ilgeriletýge múmkindik beredi. Ekinshiden, qazaqstandyq bıznestiń taýaryn jetkizgen eldegi múddesin qorǵaıdy jáne sol elde turaqty bolýyn qamtamasyz etedi. Úshinshiden, jergilikti deńgeıde otandyq shıkizattyq emes (óńdelmegen) taýarlar men qyzmetterdiń ımıdjin kóterý maqsatynda kórmeler, jarnamalyq tanystyrylym sharalaryn, semınarlar ótkizýge járdem beredi. Tórtinshiden, ornalasqan memlekettiń saýda saıasaty sharalaryn jınaýǵa jáne saraptaýǵa, qazaqstandyq taýarlar men qyzmetter eksportyn keńeıtý ári ártaraptandyrý boıynsha usynystar ázirleýge, taýarlar men qyzmetterdyń áleýetti suranysyn zerdeleýge múmkindik bolady.
«Osyǵan oraı ulttyq eksporttyq strategııaǵa sáıkes 2019 jyldan Qazaqstannyń 10 saýda ókildigin ashý josparlanǵan: Reseı (Qazan, Máskeý, Ekaterınbýrg), Ózbekstan Respýblıkasy (Tashkent), Qytaı Halyq Respýblıkasy(Úrimji, Beıjiń), Birikken Arab Ámirlikteri (Ras-el-Haıma), Qyrǵyz Respýblıkasy (Bishkek), Ázerbaıjan Respýblıkasy (Baký), Belarýs Respýblıkasy (Mınsk)», - dep atap ótedi Asqar Mamın.
