«Qazaqstan qaýipsiz álem qurýǵa kómektesýde» - respýblıkalyq basylymdarǵa sholý
***
Almatyda TMD elderi Ekonomıkalyq keńesiniń kezekti 51-shi otyrysy bolyp ótti. Keńeıtilgen kezdesýdiń jumysyna Premer-Mınıstrdiń birinshi orynbasary Ómirzaq Shókeev qatysyp, sóz sóıledi. Jıynda negizinen alǵanda, TMD elderiniń ekonomıkalyq yntymaqtastyǵyn damytyp, ony odan ári jetildirý máselelerine qatysty is-sharalar jan-jaqty talqylandy. Osy alqaly jıyn jaıynda jazylǵan maqala «Egemen Qazaqstan» gazetinde «Innovatsııalyq yntymaqtastyq ulǵaımaq» degen taqyryppen basyldy. Basylymnyń atap ótýinshe, osy keleli keńeste birqatar salmaqty máseleler qoıylyp, qarastyryldy. Máselen, jıynǵa qatysýshylar basqosýda TMD Ekonomıkalyq damýy strategııasynyń (2009-2011 jyldar) alǵashqy kezeńin júzege asyrý boıynsha atqarylǵan is-sharalar josparynyń oryndalý barysyn saraptaýmen aınalysýdy da uıǵaryp otyr.
Osy basylymda «Nıý-Iork Taıms» gazetinde jaryq kórgen «Qazaqstan qaýipsiz álem qurýǵa kómektesýde» maqalanyń qazaq tilindegi nusqasy jaryq kórdi. «Byltyrǵy qarasha aıynda Qazaqstan AQSh jáne MAGATE-men yntymaqtasa otyryp, Aqtaý qalasyndaǵy BN-350 reaktorynan 10 tonnadan artyq joǵary baıytylǵan ýran men 3 tonna qarý-jaraqtyq plýtonııdi shyǵarý jobasyn aıaqtap, olardy uzaqmerzimdi saqtaýdy uıymdastyrdy. Bular 800 ıadrolyq oqtumsyqty jasaýǵa emin-erkin jetetin shıkizat edi. Osy oqıǵa ıadrolyq qarýdy taratpaý isindegi jańa kezeńge aıaq basqandyqty kórsetti jáne jahandyq qaýipsizdikti qamtamasyz etýge qosylǵan mańyzdy úles boldy», - dep jazypty basylym. Sonymen qatar «Egemen Qazaqstan» gazetiniń búgingi nómirinen Qazaqstan Prezıdentiniń Semeı synaq polıgonyn jaýyp, ıadrolyq qarýdan óz erkimen bas tartýyna baılanysty sheteldik BAQ-tarda jarııalanǵan pikirler toptamasy da berilgen.
***
Taldyqorǵan qalasyndaǵy «Jastar» sport saraıynda aýyr atletıkadan Qazaqstan Respýblıkasynyń jazǵy Spartakıadasy aıaqtaldy. Bir aptaǵa sozylǵan jarys shıelenisti ótip, oǵan halyqaralyq arenalarda memleketimizdiń mártebesin asqaqtatyp júrgen barlyq myqtylar qatysty. Óıtkeni osy báseke arqyly 5-13 qarasha aralyǵynda Parıjde ótetin álem chempıonatyna qatysatyn ziltemirshiler anyqtaldy. Al Frantsııanyń astanasynda 2012 jyly Londonda alaýy tutanatyn Olımpıada oıyndarynyń joldamalary sarapqa salynatyny belgili. Endeshe Frantsııada ótetin baıraqty básekege kimderdiń baratynyn bilgińiz kelse, «Aıqyn» gazetindegi «Taldyqorǵandaǵy tartys Parıjge baratyndardy anyqtady» degen maqalaǵa kóz júgirtińiz.
«Aıqyn» gazetiniń jazýynsha, 25 qyrkúıek - 2 qazan aralyǵynda Almaty qalasy ákimdigi, Memlekettik qýyrshaq teatry, Dúnıejúzilik qýyrshaqshylar qaýymdastyǵy jáne «Tanaris» kompanııasy І Dúnıejúzilik qýyrshaq sherýin ótkizedi. El Táýelsizdiginiń 20 jyldyǵyna arnalǵan sharaǵa Shveıtsarııa, Portýgalııa, Frantsııa, Germanııa, Iran, Chılı, Norvegııa, Reseı, Ispanııa, AQSh, Italııa, Rýmynııa, Ýkraına, Perý, Armenııa taǵy basqa 20 memleketten qonaqtar keledi.
«Ómir merekesi» uranyn tý etken aýqymdy is álemdegi kásibı qýyrshaq mamandary men áýesqoılardyń basyn bir shańyraq astyna biriktirý, qala turǵyndary men qonaqtarynyń kóńilin kóterýge yqpal etý, Halyqaralyq qýyrshaq teatrlary festıvali men Halyqaralyq qýyrshaq fılmderi festıvalin uıymdastyrý sııaqty maqsattar kózdeıdi.
***
«Premer-Mınıstr Kárim Másimov keshe Vengrııa Respýblıkasynyń aýyl sharýashylyǵy jáne óńirlerdi damytý mınıstri Shandor Fazekashpen kezdesti», - dep jazady «Kazahstanskaıa pravda» gazeti.
Basylymnyń atap ótýinshe, kezdesý barysynda saýda-ekonomıkalyq yntymaqtastyq salasyndaǵy ekijaqty qarym-qatynasty damytý máseleleri talqylanǵan. 2011 jyldyń birinshi jartyjyldyǵynda eki el arasyndaǵy saýda aınalymy 150 mln. dollardan asyp túsken. Qazirgi ýaqytta elimizde 60-qa jýyq venger jáne qazaqstandyq-vengerlik birikken kásiporyndar jumys isteıdi.
