Qazaqstan qatysqan United Cup týrnıriniń jeńimpazy anyqtaldy
ASTANA. KAZINFORM – Aýstralııada Qazaqstan quramasy qatysqan United Cup týrnıriniń jeńimpazy anyqtaldy.
Fınalda AQSh jáne Polsha komandalary bas júldeni sarapqa saldy. Aldymen álemniń 3-raketkasy, amerıkalyq Korı Gaýff reıtıngide ekinshi orynda turǵan Iga Shventekti 6:4, 6:4 esebimen tize búktirdi.
Budan keıin álemniń 4-raketkasy, amerıkalyq Teılor Frıts asa tartysty matchta reıtıngide 16-satydaǵy Hýbert Hýrkachty qapy qaldyrdy - 6:4, 5:7, 7:6 (7:4).
Osylaısha, 2:0 esebimen jeńiske jetken AQSh quramasy 2025 jylǵy United Cup jarysynyń chempıony atandy.
Polsha tennısshileri ekinshi jyl qatarynan fınalda utylyp qaldy.
Osy aralas komandalyq jarysqa ekinshi ret qatysqan Qazaqstan quramasy jartylaı fınalǵa deıin jetti. Onda Polshaǵa jol berdi. Shırek fınalda qazaqstandyqtar ótken jylǵy chempıon Germanııany utty.
Eske sala keteıik, budan buryn Qazaqstan quramasynyń United Cup týrnıriniń fınalynan tys qalǵanyn jazǵan bolatynbyz.
Sondaı-aq Aleksandr Býblık jańa maýsymdy Adelaıda týrnırinen bastaıdy.