Qazaqstan Kaspııge PC International, Maersk, MSC, COSCO Shipping sııaqty operatorlardy tartpaqshy

NUR-SULTAN. QazAqparat – Qazaqstan Kaspıı arqyly qurǵaq júk tasymaldaýǵa PC International, Maersk, MSC, COSCO Shipping sııaqty halyqaralyq operatorlardy tartpaqshy, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngide QR Indýstrııa jáne ınfraqurylymdyq damý mınıstrligi Kólik komıteti tóraǵasynyń mindetin atqarýshysy Qasym Tilepov osyndaı málimet berdi.

Onyń aıtýynsha, Qazaqstan Kaspıı arqyly tasymaldanatyn qurǵaq júktiń kólemi artatynyn eskerip, arnaıy konteıner habyn salmaqshy. Bul habqa álemdegi iri konteıner operatorlary qyzmet kórsetýi múmkin.

«Konteınerlerdiń aǵyny artyp jatqanyn eskerip, Aqtaý portynda konteıner habyn salmaqshymyz. Osy maqsatpen halyqaralyq kólik-logıstıkalyq kompanııalardy tartý josparlanyp otyr. Onyń ishinde PC International da bar. Sondaı-aq, Maersk, Mediterranean Shipping Company, COSCO Shipping sııaqty halyqaralyq konteıner operatorlary tartylady. Qazirdiń ózinde bul kompanııalarmen belgili bir sharttar pysyqtalyp jatyr. Bul bizge olardyń konteıner parkin tartýǵa múmkindik beredi. Búginde bizde konteıner tapshy. Sondyqtan, osy konteıner parkin tarta alsaq, transporttyq-ekporttyq múmkindikterimizdi arttyrar edi», - dedi komıtet ókili.

Eske salsaq, QR Prezıdenti Qasym-Jomart Toqaev munaı tasymaldaýda Transkaspıı baǵdaryn damytýdy tapsyrǵan edi.